शहादा,दि.२७ (प्रतिनिधी)
ग्रामीण भागातील शेतकऱ्यांना आधुनिक शेती तंत्रज्ञानाची माहिती मिळावी तसेच शेती क्षेत्रात नवीन प्रयोगांची जनजागृती व्हावी या उद्देशाने के.व्ही.पटेल कृषी महाविद्यालय लोणखेडा येथील कृषीदूतांचे मोहिदे त.ह. गावात अत्यंत उत्साहात आगमन झाले. गावातील ग्रामस्थ आणि शेतकरी बांधवांनी या विद्यार्थ्यांचे उत्साहाने स्वागत केले.
येथील पूज्य साने गुरूजी विद्या प्रसारक मंडळाच्या के.व्ही.पटेल कृषी महाविद्यालयात कृषी पदवीचे शिक्षण घेत असलेले हे विद्यार्थी ‘ग्रामीण कृषी कार्य अनुभव’ कार्यक्रमांतर्गत पुढील चार महिन्यांपर्यंत मोहिदे त.ह. गावात वास्तव्यास राहणार आहेत. या कालावधीत विद्यार्थी गावातील शेतीचा अभ्यास, गावकी अभ्यास, सामाजिक परिस्थिती आणि शेतकऱ्यांशी प्रत्यक्ष संवाद साधून कृषीविषयक मोलाचे मार्गदर्शन करणार आहेत.चार महिन्यांच्या या वास्तव्यात कृषीदूतांकडून शेतकऱ्यांसाठी प्रमुख विषयांवर विशेष मार्गदर्शन आणि प्रात्यक्षिके आयोजित केली जाणार आहेत.यात आधुनिक शेती पद्धती व तंत्रज्ञान,सेंद्रिय शेतीचे महत्त्व
.
आणि कृती,शास्त्रोक्त पीक व्यवस्थापन व जलसंधारण,कीड व रोग नियंत्रण आणि खतांचा संतुलित वापर याचा समावेश आहे. हा उपक्रम महाविद्यालयाचे प्राचार्य डॉ.पी. एल. पटेल तसेच रावे प्रकल्प प्रमुख प्रा.डॉ.भगवान पाटील यांच्या मार्गदर्शनाखाली राबविण्यात येत आहे. त्यांच्या प्रेरणेने विद्यार्थी ग्रामीण भागात प्रत्यक्ष कामाचा अनुभव घेत आहेत.
या उपक्रमात कृषी महाविद्यालयाचे सहा कृषीदूत सहभागी झाले आहेत.यांत संस्कृती धोदरे,विवेक चौधरी,रोनित महाजन,तानशु चव्हाण,विशाखा वघ,रिना रावताळे यांचा सहभाग आहे.हे सर्व कृषीदूत गावातील शेतकऱ्यांना आधुनिक आणि शाश्वत शेतीसाठी प्रोत्साहित करण्याचे कार्य करणार आहेत. या तरुण कृषीदूतांच्या आगमनामुळे मोहिदे त.ह. गावातील शेतकरी वर्गामध्ये नवीन उमेद आणि उत्साहाचे वातावरण निर्माण झाले असून आगामी काळात याचा शेती उत्पादनात चांगला फायदा होईल, अशी आशा व्यक्त केली जात आहे.
