खटाव / तालुका प्रतिनिधी
खटाव येथील यशवंत विकास सोसायटीच्या नूतन कार्यालयाचे उद्घाटन मोठ्या उत्साहात आणि मान्यवरांच्या उपस्थितीत संपन्न झाले. या कार्यक्रमाला राज्याचे मदत व पुनर्वसन मंत्री मा. मकरंद आबा पाटील यांची प्रमुख उपस्थिती लाभली.
कार्यक्रमाच्या अध्यक्षस्थानी राष्ट्रवादी काँग्रेस शरद पवार गटाचे प्रदेशाध्यक्ष मा. शशिकांत शिंदे साहेब होते. तसेच माजी आमदार प्रभाकर, सातारा जिल्हा सहकारी बँकेचे संचालक प्रदीप अण्णा विधाते, सातारा जिल्हा सहकारी बँकेचे मुख्य कार्यकारी अधिकारी डॉ. राजेंद्र सरकाळे, खासदार नितीन पाटील तथा जिल्हा सहकारी बँकेचे चेअरमन यांच्या हस्ते या नवीन कार्यालयाचे विधिवत उद्घाटन करण्यात आले.
या कार्यक्रमास यशवंत विकास सेवा सोसायटी, केशवराव पाटील विकास सेवा सोसायटी तसेच पिंपळेश्वर विकास सेवा सोसायटीचे सर्व चेअरमन, संचालक, सभासद आणि परिसरातील शेतकरी मोठ्या संख्येने उपस्थित होते.
कार्यक्रमादरम्यान उपस्थित मान्यवरांनी सहकार क्षेत्राच्या बळकटीसाठी अशा संस्थांची भूमिका महत्त्वाची असल्याचे सांगितले. शेतकऱ्यांच्या विकासासाठी आणि ग्रामीण भागातील आर्थिक सक्षमीकरणासाठी सोसायट्यांनी पारदर्शक आणि लोकाभिमुख पद्धतीने कार्य करणे आवश्यक असल्याचे मत व्यक्त करण्यात आले.
कार्यक्रमाचे निमंत्रक युवा नेते राहुल पाटील यांनी उपस्थित सर्व मान्यवरांचे स्वागत केले. येणाऱ्या काळात सर्व शेतकरी, सभासद आणि संचालकांना विश्वासात घेऊन सोसायटीचे काम अधिक प्रभावीपणे केले जाईल, असा विश्वास यावेळी व्यक्त करण्यात आला.
संपूर्ण कार्यक्रम उत्साहपूर्ण वातावरणात पार पडला असून उपस्थित शेतकरी वर्गाने नव्या कार्यालयाबद्दल समाधान व्यक्त केले.
