जळगाव / प्रतिनिधी
जळगाव शहरातील प्रमुख रस्त्यांवरील वाहतूक कोंडी कमी करण्यासाठी आणि शहर अतिक्रमणमुक्त करण्यासाठी महापौर दीपमाला काळे यांनी स्वतः पुढाकार घेत अतिक्रमणविरोधी मोहीम सुरू केली आहे. शहरातील विविध भागांमध्ये महापौर स्वतः रस्त्यावर उतरून अतिक्रमण धारकांवर कारवाई करत असल्याचे चित्र सध्या पाहायला मिळत आहे.
मनपा प्रशासनाच्या पथकाकडून शहरातील अनेक प्रमुख चौक, रस्ते आणि बाजारपेठांमध्ये अनधिकृतपणे उभारण्यात आलेल्या टपऱ्या, हातगाड्या आणि लहान व्यावसायिकांच्या साहित्यावर जप्तीची कारवाई केली जात आहे. मात्र, या मोहिमेमुळे आता शहरात तीव्र चर्चा सुरू झाली असून “प्रशासन फक्त गरीब आणि सर्वसामान्य नागरिकांवरच कारवाई करत आहे का?” असा प्रश्न उपस्थित केला जात आहे.
महापौर दीपमाला काळे यांनी शहरातील वाहतूक सुरळीत करण्यासाठी कठोर भूमिका घेतली असून, मोहिमेत ढिलाई करणाऱ्या अधिकाऱ्यांनाही त्यांनी फटकारल्याची चर्चा आहे. परंतु दुसरीकडे शहरातील उच्चभ्रू भागांमध्ये आणि मुख्य रस्त्यांवर मोठ्या व्यावसायिकांनी, उद्योगपतींनी तसेच राजकीय नेत्यांशी संबंधित व्यक्तींनी केलेल्या कथित अतिक्रमणांवर मात्र कोणतीही ठोस कारवाई होत नसल्याचा आरोप नागरिकांकडून करण्यात येत आहे.
अनेक ठिकाणी पार्किंगच्या जागांवर बेकायदेशीर बांधकामे, व्यावसायिक वापरासाठी अतिक्रमण आणि रस्त्यांच्या सीमांवर उभारण्यात आलेल्या संरचनांमुळे वाहतूक कोंडी वाढत असल्याचे नागरिकांचे म्हणणे आहे. मात्र अशा मोठ्या अतिक्रमणांकडे प्रशासन जाणीवपूर्वक दुर्लक्ष करत असल्याची टीका होत आहे.
दरम्यान, शहरातील अनेक गरीब कुटुंबे आणि बेरोजगार युवक रस्त्याच्या कडेला लहान-मोठ्या टपऱ्या, खाद्यपदार्थांचे स्टॉल किंवा हातगाड्यांद्वारे आपला उदरनिर्वाह करतात. मनपाकडून पर्यायी जागा उपलब्ध करून न देता थेट त्यांच्यावर कारवाई होत असल्याने छोट्या व्यावसायिकांमध्ये असंतोषाचे वातावरण निर्माण झाले आहे.
“जर नियम सर्वांसाठी समान असतील, तर कारवाईही सर्वांवर समान पद्धतीने व्हायला हवी,” अशी भावना नागरिक व्यक्त करत आहेत. शहरातील मोठ्या अतिक्रमणांवरही कठोर कारवाई करावी, अन्यथा ही मोहीम एकतर्फी असल्याचा आरोप अधिक तीव्र होईल, असे मत नागरिकांकडून व्यक्त होत आहे.
सध्या जळगाव शहरात अतिक्रमण हटाव मोहिमेवरून राजकीय आणि सामाजिक वर्तुळात चर्चा रंगली असून, प्रशासन पुढील काळात कोणती भूमिका घेते याकडे सर्वांचे लक्ष लागले आहे.
