सेलू / जि. परभणी प्रतिनिधी आदित्य लताड
सेलू शहरात सध्या डिझेल टंचाईची गंभीर समस्या निर्माण झाली असून नागरिक, वाहनचालक तसेच शेतकरी मोठ्या अडचणीत सापडले आहेत. शहरातील फक्त एकाच पेट्रोल पंपावर डिझेल उपलब्ध असल्याने सकाळपासूनच वाहनांच्या लांबच लांब रांगा लागल्याचे चित्र पाहायला मिळत आहे.
डिझेल भरण्यासाठी नागरिकांना तासन्तास प्रतीक्षा करावी लागत असून त्यामुळे वाहनचालकांमध्ये मोठ्या प्रमाणात नाराजी व्यक्त होत आहे. शहरातील इतर पेट्रोल पंपांवर डिझेल उपलब्ध नसल्याने सर्वांचा भार एका पंपावर पडत आहे. परिणामी वाहतूक कोंडीची परिस्थितीही निर्माण होत आहे.
विशेषतः शेतीची कामे सुरू असताना डिझेल टंचाईमुळे शेतकऱ्यांना मोठ्या अडचणींचा सामना करावा लागत आहे. ट्रॅक्टर, पंप आणि शेतीसाठी वापरण्यात येणाऱ्या इतर यंत्रणांसाठी वेळेवर डिझेल उपलब्ध होत नसल्याने शेतीची कामे खोळंबत असल्याचे शेतकऱ्यांनी सांगितले.
काही नागरिकांनी “वेळेवर डिझेल मिळत नसल्याने रोजच्या कामांवर परिणाम होत आहे,” अशी प्रतिक्रिया व्यक्त केली. वाढत्या उष्णतेमध्ये नागरिकांना तासन्तास रांगेत उभे राहावे लागत असल्याने संताप अधिक वाढत आहे.
दरम्यान, प्रशासनाने या समस्येकडे तातडीने लक्ष देऊन शहरातील इतर पेट्रोल पंपांवरही डिझेल पुरवठा सुरळीत करावा, अशी मागणी नागरिकांकडून जोर धरत आहे. डिझेलचा नियमित पुरवठा सुरू न झाल्यास परिस्थिती आणखी गंभीर होण्याची शक्यता व्यक्त केली जात आहे.
