कन्नड / तालुका प्रतिनिधी ३५७९
कन्नड तालुक्यातील नावडी शिवारात शेताच्या सामाईक बांधावरील बाभळीची झाडे तोडण्याच्या कारणावरून झालेल्या वादातून मारहाणीची घटना घडली असून या प्रकरणी कन्नड पोलीस ठाण्यात गुन्हा दाखल करण्यात आला आहे.
कन्नड पोलीस ठाण्यातून मिळालेल्या माहितीनुसार, नावडी येथील देवनाथ साहेबराव मुरकुंडे यांनी याबाबत फिर्याद दिली आहे. फिर्यादीच्या म्हणण्यानुसार, नावडी शिवारातील गट क्रमांक ३०६ मधील त्यांच्या शेताच्या सामाईक बांधावर बाभळीची झाडे होती. ही झाडे तोडण्याच्या कारणावरून संबंधितांमध्ये किरकोळ वाद झाला होता.
या वादाचे रूपांतर पुढे मारहाणीत झाले. फिर्यादीच्या आरोपानुसार महेश अंकुश मुरकुंडे, अविनाश काकासाहेब मुरकुंडे, सुनील, अनिल जगदीश मुरकुंडे, छगन हरी मुरकुंडे, काकासाहेब मुरकुंडे तसेच अंकुश बाबुराव मुरकुंडे यांनी एकत्र येत लाथाबुक्क्यांनी मारहाण केली.
या मारहाणीत फिर्यादी देवनाथ मुरकुंडे जखमी झाले असून त्यांच्या डोळ्याला दुखापत झाल्याचे सांगण्यात आले आहे.
या प्रकरणी कन्नड पोलीस ठाण्यात संबंधितांविरुद्ध गुन्हा नोंदविण्यात आला असून पुढील तपास पोलीस करीत आहेत.
