कन्नड तालुका / प्रतिनिधी
अनुसूचित जाती (SC) प्रवर्गाच्या उप-वर्गीकरणाच्या निर्णयाविरोधात आझाद समाज पार्टीच्या वतीने छत्रपती संभाजीनगर येथे तीव्र आंदोलन करण्यात आले. पक्षाच्या शेकडो कार्यकर्त्यांनी एकत्र येत जिल्ह्याचे पालकमंत्री संजय शिरसाट यांच्या निवासस्थानावर धडक मोर्चा काढून सरकारविरोधात जोरदार घोषणाबाजी केली.
सर्वोच्च न्यायालयाने अनुसूचित जातींच्या उप-वर्गीकरणाबाबत दिलेल्या निर्णयानंतर देशभरात विविध प्रतिक्रिया उमटत असून, आझाद समाज पार्टीने या निर्णयाला कडाडून विरोध दर्शवला आहे. हा निर्णय दलित समाजात फूट पाडणारा असून आरक्षणाच्या मूळ घटनात्मक उद्देशालाच धक्का देणारा असल्याचा आरोप आंदोलनकर्त्यांनी केला.
मोर्चादरम्यान कार्यकर्त्यांनी “आरक्षणाची मूळ रचना अबाधित ठेवा”, “दलित समाजात फूट पाडण्याचे राजकारण बंद करा” अशा घोषणा देत निषेध व्यक्त केला. अनुसूचित जातींचे अंतर्गत वर्गीकरण केल्यास सामाजिक ऐक्यावर परिणाम होईल आणि बहुजन समाजात मतभेद वाढतील, अशी भूमिका आंदोलनकर्त्यांनी मांडली.
यावेळी आंदोलकांनी पालकमंत्री संजय शिरसाट यांनी जिल्ह्याच्या प्रतिनिधी म्हणून दलित समाजाच्या भावना राज्य सरकार आणि केंद्र सरकारपर्यंत पोहोचवाव्यात, अशी मागणी केली.
आंदोलनादरम्यान पक्षाच्या पदाधिकाऱ्यांनी सरकारवर टीका करत “आरक्षणाच्या मूळ रचनेला धक्का लावून समाज कमकुवत करण्याचा प्रयत्न सुरू आहे. जोपर्यंत सरकार या निर्णयाला स्थगिती देत नाही, तोपर्यंत आंदोलन अधिक तीव्र करण्यात येईल,” असा इशारा दिला.
दरम्यान, पालकमंत्र्यांच्या निवासस्थानावर मोर्चा धडकणार असल्याने कोणताही अनुचित प्रकार घडू नये यासाठी पोलिस प्रशासनाने चोख बंदोबस्त ठेवला होता. आंदोलकांनी पालकमंत्र्यांच्या निवासस्थानाबाहेर जोरदार घोषणाबाजी करत आपला निषेध नोंदवला. तसेच आपल्या मागण्यांचे निवेदन प्रशासकीय अधिकाऱ्यांमार्फत पालकमंत्र्यांकडे सुपूर्द करण्यात आले.
या आंदोलनामुळे छत्रपती संभाजीनगर शहरातील राजकीय वातावरण चांगलेच तापले असून, एससी वर्गीकरणाच्या मुद्द्यावर पुढील काळात आंदोलन आणखी तीव्र होण्याची शक्यता व्यक्त केली जात आहे.
