धाराशिव | प्रतिनिधी
राज्यातील स्थानिक स्वराज्य संस्था मतदारसंघाच्या निवडणुकांना अवघे काही दिवस शिल्लक असताना धाराशिव-लातूर-बीड मतदारसंघातील राजकीय वातावरण तापू लागले आहे. भारतीय जनता पक्षाने उमेदवारी दिलेले बसवराज पाटील हे आता पक्षांतर्गत राजकारणामुळे चर्चेत आले असून, त्यांनी अप्रत्यक्षपणे पक्षातील काही स्थानिक नेत्यांकडून दगा-फटका होण्याची शक्यता व्यक्त केल्याची चर्चा रंगली आहे.
सोशल मीडियावर सध्या एक संदेश मोठ्या प्रमाणात व्हायरल होत आहे. या संदेशामध्ये बसवराज पाटील, त्यांचे बंधू व जिल्हा मध्यवर्ती सहकारी बँकेचे अध्यक्ष बापूराव पाटील आणि सुपुत्र शरण पाटील यांचे छायाचित्र वापरण्यात आले असून, “सगळी सूत्रे इथूनच हलतात” असा सूचक उल्लेख करण्यात आला आहे. या संदेशामुळे भाजपच्या स्थानिक राजकारणात विविध तर्क-वितर्कांना उधाण आले आहे.
धाराशिव जिल्ह्यात भाजपची संघटनात्मक बांधणी करण्यात माजी आमदार सुजितसिंह ठाकूर यांचे मोठे योगदान मानले जाते. त्यांच्या नेतृत्वाखाली पक्षाचा विस्तार झाला आणि २०१६ मध्ये त्यांना विधान परिषदेवर संधीही मिळाली. त्यांच्याच मार्गदर्शनाखाली दत्ताभाऊ कुलकर्णी यांनी जिल्हाध्यक्षपदापर्यंत मजल मारली. त्यामुळे स्थानिक स्वराज्य संस्थेच्या निवडणुकीसाठी ठाकूर किंवा कुलकर्णी यांपैकी कोणाला तरी उमेदवारी मिळेल, अशी कार्यकर्त्यांमध्ये अपेक्षा होती.
मात्र उमेदवारी अर्ज भरण्याच्या काही तासांपूर्वी भाजपने लातूर ग्रामीणचे अध्यक्ष बसवराज माधवराव पाटील (मुरूमकर) यांना अधिकृत उमेदवारी जाहीर केली. त्यानंतर १ जून रोजी झालेल्या पत्रकार परिषदेत भाजपच्या नेत्यांनी बसवराज पाटील हे राज्यातील सर्वाधिक मतांनी निवडून येणारे उमेदवार ठरतील, असा विश्वास व्यक्त केला होता.
दरम्यान, बसवराज पाटील यांच्या उमेदवारीवर विविध स्तरांतून टीका होत असल्याने ते अस्वस्थ असल्याचे बोलले जात आहे. विशेष म्हणजे त्यांच्या तालुक्यातील काँग्रेसचे युवा नेते व जिल्हा परिषद सदस्य महेश देशमुख हे देखील निवडणुकीच्या रिंगणात असल्याने सामना अधिक चुरशीचा होण्याची शक्यता आहे.
याच पार्श्वभूमीवर सोशल मीडियावरील संदेशातून व्यक्त करण्यात आलेल्या सूचक इशाऱ्यामुळे भाजपमधील अंतर्गत मतभेद आणि संभाव्य गटबाजीबाबत चर्चांना अधिक उधाण आले आहे. मात्र या संदेशाबाबत किंवा दगा-फटक्याच्या चर्चेबाबत पक्षाच्या कोणत्याही अधिकृत नेत्याने अद्याप भाष्य केलेले नाही.
स्थानिक स्वराज्य संस्था निवडणुकीच्या पार्श्वभूमीवर पुढील काही दिवसांत या राजकीय घडामोडींना अधिक वेग येण्याची शक्यता व्यक्त केली जात आहे.
