हिवरा तांडा येथे अवैध मोहा दारू निर्मितीवर वर्धा जिल्हा पोलिसांनी मोठी कारवाई करत सुमारे 6 लाख 40 हजार रुपयांचा मुद्देमाल जप्त केला आहे. या प्रकरणी एका आरोपीविरुद्ध गुन्हा दाखल करण्यात आला असून जिल्ह्यातील दारूबंदी मोहिमेला अधिक गती मिळाली आहे.
मिळालेल्या माहितीनुसार, 16 जून 2026 रोजी वर्धा जिल्हा पोलीस यांच्या विशेष दारूबंदी मोहिमेअंतर्गत आर्वी पोलीस ठाण्याच्या हद्दीतील हिवरा तांडा शिवारात छापा टाकण्यात आला. आरोपी नारायण जाधव यांच्या शेतामध्ये अवैधरित्या मोहा दारू तयार करण्यासाठी साठवून ठेवलेले 15 लोखंडी ड्रममध्ये सुमारे 3000 लिटर मोहा रसायन सडवा तसेच गाळपासाठी लागणारे साहित्य आढळून आले.
पोलिसांनी घटनास्थळावरून एकूण 6 लाख 40 हजार रुपयांचा मुद्देमाल जप्त केला असून आरोपीविरुद्ध आर्वी पोलीस ठाणे येथे गुन्हा नोंद करण्यात आला आहे.
ही कारवाई पोलीस अधीक्षक सौरभ कुमार अग्रवाल आणि अपर पोलीस अधीक्षक सदाशिव वाघमारे यांच्या मार्गदर्शनाखाली पार पडली. दारूबंदी पथक आर्वी उपविभागाचे सपौनि पद्माकर मुंडे, पोउपनि कल्येश मगरे, पोहवा राजेश पाचरे, पोशि प्रतिक नगराळे, मपोशि शिल्पा राऊत तसेच चालक पोशि सुरज भांनगे यांनी संयुक्तरित्या ही कारवाई केली.
पोलिसांच्या या धडक कारवाईमुळे अवैध दारू निर्मिती करणाऱ्यांमध्ये खळबळ उडाली असून जिल्ह्यात अशा कारवायांचे सत्र अधिक तीव्र होण्याची शक्यता व्यक्त केली जात आहे.
