कहाळा :
कहाळा खुर्द (ता. नायगाव) येथील प्राथमिक शाळेत शाळेच्या पहिल्या दिवशी विद्यार्थ्यांचे उत्साहात स्वागत करण्यात आले. या प्रसंगी विद्यार्थ्यांना मोफत गणवेश, पाठ्यपुस्तके व शालेय साहित्याचे वाटप करण्यात आले. नवोदित विद्यार्थ्यांसह सर्वांच्या चेहऱ्यावर आनंद ओसंडून वाहत असल्याचे चित्र यावेळी पाहायला मिळाले.
याचप्रमाणे कहाळा बु., मांडणी व सोमठाणा येथील शाळांमध्येही पहिल्या दिवशी विद्यार्थ्यांचे स्वागत करण्यात आले. शाळेचा पहिला दिवस विद्यार्थ्यांसाठी आनंददायी आणि अविस्मरणीय ठरला.
गावातील श्री संत बाळगीर महाराज हायस्कूल तसेच जिल्हा परिषद प्राथमिक शाळा येथेही शिक्षकवर्गाकडून विद्यार्थ्यांचे उत्साहपूर्ण स्वागत करण्यात आले. कहाळा बु. येथे सेमी इंग्रजी माध्यमाची नवीन सुरुवात झाल्याने पालकांनी मुख्याध्यापक संभाजी आलेवाड व सर्व शिक्षकांचे आभार मानले.
जिल्हा परिषद शाळांमध्ये सर्व भौतिक सुविधा आणि गुणवत्तापूर्ण शिक्षण उपलब्ध होत असल्याने विद्यार्थ्यांचा ओढा वाढत असल्याचे मुख्याध्यापकांनी सांगितले. शाळेच्या व्हरांड्यात उभारण्यात आलेल्या सेल्फी पॉइंटमुळे विद्यार्थ्यांसह पालकांनीही फोटो काढून आनंद व्यक्त केला.
दरम्यान, अनेक पालक व नागरिकांनी शाळेच्या पहिल्या दिवशी विद्यार्थ्यांचे स्वागत करणारे स्टेटस व्हॉट्सॲपवर ठेवले. काहींनी आपल्या पाल्यासह सेल्फी पॉइंटवर फोटो काढून विद्यार्थ्यांना नियमित शाळेत पाठविण्याचे आवाहन केले. त्यामुळे सोमवारचा दिवस संपूर्ण परिसरासाठी आनंददायी आणि अविस्मरणीय ठरला.
