परभणी | प्रतिनिधी –
२१ जून रोजी आंतरराष्ट्रीय योग दिनानिमित्त जिल्हा परिषद प्राथमिक शाळा, उक्कलगाव येथे योग दिन मोठ्या उत्साहात साजरा करण्यात आला. योग ही भारताची प्राचीन परंपरा असून योगामुळे शरीर निरोगी राहते, मन शांत होते आणि तणाव दूर होण्यास मदत होते. २०१५ पासून संयुक्त राष्ट्रसंघाच्या माध्यमातून आंतरराष्ट्रीय योग दिन जगभर साजरा केला जात आहे.
या निमित्ताने उक्कलगाव येथे सकाळी ७.०० ते ८.०० या वेळेत योग शिक्षक श्री. विलास मिटकरी सर यांच्या नेतृत्वाखाली योग उपक्रमाचे आयोजन करण्यात आले. या उपक्रमात गावातील ज्येष्ठ नागरिक, पालक, शिक्षणप्रेमी नागरिक तसेच विद्यार्थ्यांनी उत्स्फूर्त सहभाग नोंदविला.
कार्यक्रमास ज्येष्ठ पदवीधर शिक्षक श्री. सरोदे सर, श्री. शिंदाळकर सर, श्री. योगेश देशमुख सर यांच्यासह शाळेतील सर्व विद्यार्थी मोठ्या उत्साहाने सहभागी झाले होते.
जागतिक योग दिनानिमित्त आयोजित या कार्यक्रमास गटशिक्षणाधिकारी श्री. तोष्णीवाल साहेब, पंचायत समिती सदस्य तथा माजी सभापती श्री. शिवाजीराव उक्कलकर, सरपंच श्री. उत्तमराव गायकवाड, उपसरपंच श्री. एकनाथराव पिंपळे, शालेय व्यवस्थापन समिती अध्यक्षा श्रीमती राणीताई अंकुशराव पिंपळे, उपाध्यक्ष श्री. सोपानराव पिंपळे, शालेय व्यवस्थापन समिती सदस्य, मुख्याध्यापक श्री. शेख सर, शाळेतील शिक्षक-शिक्षिका व शिक्षणप्रेमी नागरिक उपस्थित होते.
उपस्थित मान्यवरांनी विद्यार्थ्यांना नियमित योगाभ्यास करण्याचे आवाहन करत योगाचे महत्त्व पटवून दिले.
