परभणी | प्रतिनिधी :
पाथरी-परभणी महामार्गावरील ताडबोरगावजवळ शनिवारी रात्री सुमारे दहा वाजण्याच्या सुमारास कार आणि मोटारसायकल यांच्यात झालेल्या समोरासमोरच्या भीषण धडकेत एका दुचाकीस्वाराचा जागीच मृत्यू झाल्याची दुर्दैवी घटना घडली. या घटनेमुळे परिसरात हळहळ व्यक्त करण्यात येत आहे.
मिळालेल्या माहितीनुसार, परभणीकडून मानवतकडे जाणारी कार (क्र. एमएच 01 बीजी 0564) आणि पाथरीकडून ताडबोरगावकडे येणारी मोटारसायकल (क्र. एमएच 22 एबी 9200) यांची देवलगाव पाटीजवळ समोरासमोर जोरदार धडक झाली. धडक इतकी भीषण होती की मोटारसायकलस्वार विलास कोंडीबा टेकाळे (वय 42, रा. देवनांद्रा, ता. पाथरी) यांचा घटनास्थळीच मृत्यू झाला.
अपघाताची माहिती मिळताच परिसरातील नागरिकांनी घटनास्थळी धाव घेतली. तसेच पोलिसांना याबाबत माहिती देण्यात आली. पोलिसांनी तात्काळ घटनास्थळी पोहोचून पंचनामा केला व मृतदेह पुढील वैद्यकीय आणि कायदेशीर प्रक्रियेसाठी पाठविला.
या अपघातामुळे काही काळ वाहतुकीवर परिणाम झाला होता. पोलिसांनी तत्काळ परिस्थिती नियंत्रणात आणत वाहतूक सुरळीत केली. अपघाताचे नेमके कारण अद्याप स्पष्ट झाले नसून, याप्रकरणी मानवत पोलीस ठाण्यात गुन्ह्याची नोंद करण्यात आली आहे. पुढील तपास पोलीस करीत आहेत.
या दुर्दैवी घटनेमुळे देवनांद्रा गावावर शोककळा पसरली असून, विलास टेकाळे यांच्या निधनाने कुटुंबीयांवर दुःखाचा डोंगर कोसळला आहे.
