वाई | प्रतिनिधी
महाराष्ट्र शासनाने प्रतिबंधित केलेल्या गुटख्याची Wai शहर व परिसरात छुप्या पद्धतीने विक्री होत असल्याचा धक्कादायक प्रकार समोर आला आहे. अन्न व औषध प्रशासनाच्या कारवायांपासून बचाव करण्यासाठी काही विक्रेत्यांकडून नामांकित ब्रँडचा गुटखा पांढऱ्या कागदात गुंडाळून ‘सुपारी’ या नावाखाली विकला जात असल्याचे सांगितले जात आहे.
स्थानिकांच्या म्हणण्यानुसार, पोलिस आणि Food and Drug Administration Maharashtra यांच्या कारवाईपासून बचाव करण्यासाठी काही विक्रेत्यांनी वेगळी शक्कल लढवली आहे. विमलसारख्या गुटख्याचे मूळ पॅकिंग ग्राहकांना न दाखवता तंबाखूसह मिश्रण करून पांढऱ्या कागदात पुड्या तयार केल्या जातात. नियमित आणि ओळखीच्या ग्राहकांना ‘सुपारी पाहिजे का?’ असा सांकेतिक प्रश्न विचारून या पुड्या दिल्या जात असल्याचा दावा केला जात आहे.
अचानक छापे पडल्यास केवळ पांढऱ्या कागदाच्या पुड्या दिसत असल्याने प्रशासनाची दिशाभूल करणे सोपे होत असल्याचेही बोलले जात आहे. या प्रकारामुळे शहरातील काही पानटपऱ्यांवर प्रतिबंधित गुटखा मुळ किंमतीपेक्षा दुप्पट-तिप्पट दराने विकला जात असल्याचा आरोप नागरिकांनी केला आहे.
स्थानिक नागरिकांच्या मते, या छुप्या विक्रीमुळे तरुण पिढी गुटख्याच्या व्यसनाच्या आहारी जात असून आरोग्याच्या गंभीर समस्या निर्माण होण्याची भीती व्यक्त केली जात आहे. त्यामुळे प्रशासनाने या प्रकाराची गांभीर्याने दखल घेऊन अशा विक्रेत्यांवर कठोर कारवाई करावी, अशी मागणी होत आहे.
दरम्यान, या प्रकरणाबाबत संबंधित प्रशासनाची अधिकृत भूमिका अद्याप समोर आलेली नाही.
