Purjal : ग्रामपंचायत पुरजळच्या वार्ड क्रमांक ३ मधील मुख्य रस्त्यावर साचलेल्या घाणीमुळे आणि नालीच्या पाण्यामुळे परिसरात गंभीर अस्वच्छता निर्माण झाली आहे. या रस्त्यावर जिल्हा परिषद शाळा असल्याने विद्यार्थ्यांना दररोज मोठ्या त्रासाला सामोरे जावे लागत असून परिसरातील नागरिकांच्या आरोग्यावरही परिणाम होत असल्याची तक्रार स्थानिकांनी केली आहे.
स्थानिक नागरिकांच्या म्हणण्यानुसार, नालीचे पाणी रस्त्यावर साचत असल्याने दुर्गंधी पसरली असून डासांचे प्रमाण वाढले आहे. त्यामुळे नागरिक वारंवार आजारी पडत आहेत. विशेषतः शाळकरी विद्यार्थ्यांना या घाणीमधूनच ये-जा करावी लागत असल्याने पालकांमध्ये चिंता व्यक्त होत आहे.
या समस्येबाबत ग्रामविकास अधिकाऱ्यांना वारंवार निवेदन देऊन तक्रारी करण्यात आल्याचा दावा नागरिकांनी केला आहे. मात्र, अद्याप कोणतीही ठोस कार्यवाही करण्यात आलेली नसल्याने ग्रामस्थांमध्ये संतापाचे वातावरण आहे.
स्थानिकांनी इशारा देत सांगितले की, येत्या दोन दिवसांत नालीच्या पाण्याची योग्य विल्हेवाट लावून परिसर स्वच्छ करण्यात आला नाही, तर Zilla Parishad Hingoliच्या मुख्य कार्यकारी अधिकाऱ्यांच्या कार्यालयासमोर उपोषण आंदोलन करण्यात येईल.
नागरिकांनी प्रशासनाने तातडीने लक्ष घालून विद्यार्थ्यांचे आणि ग्रामस्थांचे आरोग्य धोक्यात येणार नाही यासाठी आवश्यक उपाययोजना कराव्यात, अशी मागणी केली आहे.
