रावेत | प्रतिनिधी
रावेत परिसरातील देहूरोड महावितरण विभागाच्या कार्यक्षेत्रातील अनेक निवासी सोसायट्यांमध्ये गेल्या ४८ तासांपासून वीजपुरवठा खंडित असल्याने नागरिकांचे जनजीवन विस्कळीत झाले आहे. परिसरातील १५ ते २५ मजली उंच निवासी इमारतींमध्ये शेकडो कुटुंबे वास्तव्यास असून, त्यामध्ये ज्येष्ठ नागरिक, लहान मुले आणि आजारी व्यक्तींची संख्या मोठी आहे.
वीजपुरवठा खंडित झाल्यामुळे सोसायट्यांतील लिफ्ट सेवा पूर्णपणे बंद पडली आहे. त्यामुळे ज्येष्ठ नागरिक आणि रुग्णांना जिन्याने ये-जा करताना मोठा त्रास सहन करावा लागत आहे. तसेच पाणीपुरवठा, मोबाईल चार्जिंग, इंटरनेट सेवा आणि इतर अत्यावश्यक सुविधांवरही परिणाम झाला असून, वाढत्या उकाड्यामुळे नागरिकांच्या गैरसोयींमध्ये भर पडली आहे.
या गंभीर समस्येकडे लक्ष वेधत रावेत येथील रहिवासी व सामाजिक कार्यकर्ते निलेश भोसले यांनी महावितरण प्रशासनाने तातडीने दखल घेऊन वीजपुरवठा पूर्ववत करावा, तसेच वीज खंडित होण्याचे नेमके कारण आणि पुरवठा कधी सुरू होणार याबाबत नागरिकांना स्पष्ट माहिती द्यावी, अशी मागणी केली आहे.
दरम्यान, स्थानिक नागरिकांनीही संबंधित अधिकाऱ्यांनी या प्रश्नाकडे गांभीर्याने लक्ष देऊन त्वरित उपाययोजना कराव्यात, जेणेकरून परिसरातील नागरिकांना दिलासा मिळेल, अशी मागणी केली आहे.
