बांबवडे | प्रतिनिधी :
शाहूवाडी-पन्हाळावासीय सेवा संघातर्फे पन्हाळा व शाहूवाडी तालुक्यातील १५० गुणवंत विद्यार्थ्यांचा भव्य सत्कार सोहळा शिवाजी पार्क येथील विद्याभवन सभागृहात उत्साहात पार पडला. दहावी-बारावीतील गुणवंत विद्यार्थी, शिष्यवृत्तीधारक, स्पर्धा परीक्षा उत्तीर्ण झालेले तरुण तसेच राज्य व राष्ट्रीय स्तरावर उल्लेखनीय कामगिरी करणाऱ्या खेळाडूंचा यावेळी गौरव करण्यात आला.
यावेळी सर्व गुणवंतांना गौरवचिन्ह, प्रमाणपत्र आणि कै. शं. रा. सनगर गुरुजी शिष्यवृत्ती प्रदान करून सन्मानित करण्यात आले.
कार्यक्रमाचे प्रमुख आकर्षण ठरला ‘शाहूवाडी-पन्हाळा रत्न पुरस्कार २०२६’. विरळे येथील रहिवासी व श्लोक को-ऑप. क्रेडिट सोसायटीचे संस्थापक अविनाश पाटील यांना त्यांच्या सामाजिक व सहकार क्षेत्रातील योगदानाबद्दल हा प्रतिष्ठेचा पुरस्कार सपत्नीक प्रदान करण्यात आला.
कार्यक्रमाच्या अध्यक्षस्थानी शिक्षक नेते दादासाहेब लाड होते, तर मुंबई विद्यापीठाच्या निरंतर विभागाचे निवृत्त संचालक डॉ. दिलीप पाटील हे प्रमुख पाहुणे म्हणून उपस्थित होते.
यावेळी निवृत्त नौदल अधिकारी एन. डी. चाळके, जिल्हा शैक्षणिक व्यासपीठाचे अध्यक्ष एस. डी. लाड, निवृत्त अधीक्षक अभियंता डी. वाय. कदम, गोकुळचे व्यवस्थापक डॉ. टी. एस. कडवेकर, मुख्याध्यापक संघाचे उपाध्यक्ष रवींद्र मोरे, सुवर्णकार दत्तात्रय पोतदार, अनिता नलगे, उषा चाळके, प्रकाश कोकाटे आणि सुरेश पाटील यांच्यासह विविध क्षेत्रातील मान्यवर उपस्थित होते.
कार्यक्रमाची सुरुवात सेवा संघाचे अध्यक्ष अनिल चव्हाण यांनी स्वागतपर भाषणाने केली. आर. बी. पाटील यांनी मानपत्राचे वाचन केले. कार्यक्रमाचे सूत्रसंचालन बाळाराम लाड यांनी केले, तर उपाध्यक्ष आनंदराव लोखंडे यांनी उपस्थितांचे आभार मानले.
या गौरव सोहळ्यास शाहूवाडी व पन्हाळा तालुक्यातील विद्यार्थी, पालक, शिक्षक आणि नागरिकांची मोठ्या संख्येने उपस्थिती लाभली. गुणवंत विद्यार्थ्यांच्या यशाचा गौरव करत त्यांच्या उज्ज्वल भविष्यासाठी शुभेच्छांचा वर्षाव करण्यात आला.
