बीड | प्रतिनिधी
बीड जिल्ह्यात सध्या सुरू असलेल्या विशेष सखोल पुनरीक्षण (SIR) मोहिमेला वेग आला असून, घरभेटीद्वारे मतदारांची माहिती अद्ययावत करण्याचे काम सुरू आहे. या मोहिमेत बीड शहरातील मुस्लिम नगरसेवक आणि कार्यकर्त्यांनी सक्रिय सहभाग घेत नागरिकांमध्ये जनजागृती सुरू केली आहे.
स्थानिक पातळीवर अनेक नगरसेवक व कार्यकर्ते आपल्या प्रभागातील नागरिकांना फोन करून बीएलओ भेटीची माहिती देत आहेत. तसेच गणना प्रपत्र कसे भरायचे, त्यासाठी कोणती कागदपत्रे आवश्यक आहेत, याबाबत मार्गदर्शनही करत आहेत. त्यामुळे अनेक नागरिक स्वतःहून बीएलओंना आवश्यक माहिती उपलब्ध करून देत असल्याचे सांगितले जात आहे.
या प्रयत्नांमुळे संबंधित भागांमध्ये एसआयआरचे सुमारे ७० ते ८० टक्के काम पूर्ण झाल्याचा दावा करण्यात आला असून, इतर भागांमध्येही अशीच जनजागृती होण्याची अपेक्षा व्यक्त करण्यात येत आहे.
गणना प्रपत्र भरण्याचे वेळापत्रक
प्रशासनाच्या माहितीनुसार, ३० जून ते २९ जुलै २०२६ या कालावधीत बीएलओ घरभेटीद्वारे गणना प्रपत्र भरून घेत आहेत. त्यानंतर ५ ऑगस्ट २०२६ रोजी प्रारूप मतदार यादी प्रसिद्ध करण्यात येणार असून, ५ ऑगस्ट ते ४ सप्टेंबर दरम्यान दावे व हरकती स्वीकारल्या जातील. सुनावणी प्रक्रिया पूर्ण झाल्यानंतर ७ ऑक्टोबर २०२६ रोजी अंतिम मतदार यादी प्रसिद्ध केली जाणार आहे.
बीएलओ तुमच्या दारी
प्रशासनाने मतदारांना अर्जातील नाव, पत्ता, जन्मतारीख, मोबाईल क्रमांक, कुटुंबातील सदस्यांची माहिती, आधार तपशील, छायाचित्र आणि इतर आवश्यक माहिती अचूकपणे देण्याचे आवाहन केले आहे.
या मोहिमेसाठी जिल्ह्यात २,४१६ बीएलओ, २४४ बीएलओ पर्यवेक्षक आणि २,६१६ बीएलओ सहाय्यक नियुक्त करण्यात आले आहेत. तसेच काही भागांत स्थानिक लोकप्रतिनिधींनी बीएलओंची नावे व संपर्क क्रमांक नागरिकांच्या व्हॉट्सअॅप गटांवर उपलब्ध करून दिले असून, कोणतीही अडचण असल्यास संबंधित निवडणूक अधिकाऱ्यांशी संपर्क साधण्याचे आवाहन करण्यात आले आहे.
मतदारांनी वेळेत माहिती देऊन मतदार यादी अद्ययावत करण्यासाठी सहकार्य करावे, असे आवाहन प्रशासनाकडून करण्यात आले आहे.
