शिरूर | प्रतिनिधी
शिरूर तालुक्यातील सोने सांगवी येथील अनुसूचित जाती व नवबौद्ध समाजासाठी उभारण्यात आलेल्या सभामंडपासंदर्भातील तक्रारीची दखल घेत पंचायत समितीने चौकशी प्रक्रिया सुरू केली आहे. या प्रकरणाच्या तपासासाठी त्रिस्तरीय चौकशी समितीची स्थापना करण्यात आली असून संबंधित अधिकाऱ्यांना अहवाल सादर करण्याचे आदेश देण्यात आले आहेत.
गटविकास अधिकारी महेश डोके यांनी दि. ६ जुलै २०२६ रोजी तातडीने चौकशी करून अहवाल सादर करण्याचे निर्देश दिले आहेत. या समितीत शाखा अभियंता अनिल गावडे, समाजकल्याण विभागाचे विस्तार अधिकारी राठोड तसेच पंचायत समितीचे विस्तार अधिकारी राठोड यांचा समावेश आहे.
प्राथमिक चौकशीदरम्यान पंचायत समितीने सार्वजनिक बांधकाम विभागाकडून माहिती मागविली. विभागाने दिलेल्या उत्तरानुसार, २९ नोव्हेंबर २०२१ रोजी झालेल्या ग्रामपंचायत बैठकीतील ठराव क्रमांक ८ नुसार तत्कालीन सरपंच दत्तात्रय त्रिंबक कदम व ग्रामसेवक छाया साकोरे यांनी संबंधित सभामंडप गट क्रमांक २३३ मध्ये उभारण्याचा प्रस्ताव दिला होता. या ठरावाच्या सूचक म्हणून तत्कालीन उपसरपंच संगीता आनंदा डांगे यांचे नाव नमूद असल्याची माहिती समोर आली आहे.
तक्रारदार अमोल बोऱ्हाडे यांनी आरोप केला आहे की, सभामंडप उभारण्यात आलेली जागा त्यावेळी अनुसूचित जाती-जमातीसाठी आरक्षित नव्हती, तसेच ती खासगी मालकीची होती. नंतर संबंधित जागेचे बक्षीसपत्र करण्यात आल्याचा दावा त्यांनी केला आहे. तसेच सभामंडप हस्तांतरणाच्या प्रक्रियेत ग्रामपंचायतीच्या ठरावामध्ये अनियमितता झाल्याचाही आरोप करण्यात आला आहे.
या प्रकरणात प्रत्यक्षात कोणती प्रक्रिया राबविण्यात आली, नियमांचे पालन झाले का, तसेच संबंधितांवर कोणती कारवाई होणार, याबाबत चौकशी अहवालानंतरच स्पष्टता येणार आहे. दरम्यान, या प्रकरणाची निष्पक्ष चौकशी करून अनुसूचित जाती व नवबौद्ध समाजाला न्याय मिळावा, अशी मागणी स्थानिकांकडून करण्यात येत आहे.
