मुंबई | प्रतिनिधी :
आझाद मैदान, मुंबई येथे सुरू असलेल्या अनुदान आंदोलनाच्या पार्श्वभूमीवर राज्यातील अनुदानित व विनाअनुदानित शिक्षकांच्या प्रलंबित प्रश्नांबाबत मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि शालेय शिक्षण मंत्री दादाजी भुसे यांच्यासोबत शिक्षक व पदवीधर आमदारांच्या शिष्टमंडळाची महत्त्वपूर्ण बैठक पार पडली.
या बैठकीत शिष्टमंडळाने शिक्षकांच्या अनुदानासंदर्भातील प्रलंबित प्रश्नांवर तातडीने निर्णय घेण्याची मागणी केली. त्यावर मुख्यमंत्री यांनी विषयाची गांभीर्याने दखल घेत संबंधित प्रश्नांवर सविस्तर चर्चा करण्यासाठी आज सकाळी ११ वाजता मुख्यमंत्री, उपमुख्यमंत्री, शालेय शिक्षण मंत्री आणि संबंधित वरिष्ठ अधिकाऱ्यांची संयुक्त उच्चस्तरीय बैठक आयोजित करण्यात येणार असल्याचे सांगितले.
या बैठकीत अनुदानाच्या प्रश्नावर सकारात्मक आणि ठोस निर्णय घेण्यासाठी चर्चा होईल, असे आश्वासन मुख्यमंत्री यांनी दिल्याची माहिती शिष्टमंडळातील सदस्यांनी दिली.
या घडामोडींमुळे राज्यभरातील अनुदानित व विनाअनुदानित शिक्षकांमध्ये आशेचे वातावरण निर्माण झाले असून, आज होणाऱ्या उच्चस्तरीय बैठकीतील निर्णयाकडे सर्वांचे लक्ष लागले आहे.
