पुणे | प्रतिनिधी
शिरूर शहरातील लाटे आळी येथील नगरपरिषद प्राथमिक शाळा क्रमांक १ व २ या ऐतिहासिक शाळेला ‘सत्यशोधक महात्मा ज्योतिराव फुले’ यांचे नाव देण्यात यावे, अशी मागणी लहुजी शक्ती सेनेचे युवक जिल्हाध्यक्ष विशाल उर्फ बंटी जोगदंड यांनी शिरूर नगरपरिषदेच्या मुख्याधिकाऱ्यांकडे निवेदनाद्वारे केली आहे.
निवेदनात म्हटले आहे की, सत्यशोधक चळवळीचे प्रणेते, थोर समाजसुधारक आणि आधुनिक शिक्षणाचे जनक म्हणून महात्मा ज्योतिराव फुले यांचे कार्य देशासाठी प्रेरणादायी आहे. समाजातील वंचित, बहुजन, शोषित तसेच महिलांना शिक्षणाच्या मुख्य प्रवाहात आणण्यासाठी त्यांनी आयुष्यभर कार्य केले.
१ जानेवारी १८४८ रोजी पुण्यातील भिडे वाड्यात क्रांतीज्योती सावित्रीबाई फुले यांच्या सहकार्याने देशातील पहिली मुलींची शाळा सुरू करून महात्मा फुले यांनी भारतीय शिक्षण क्षेत्रात क्रांतिकारी पाऊल टाकले. त्यानंतर त्यांनी महाराष्ट्रात बहुजन समाज आणि महिलांच्या शिक्षणासाठी एकूण १८ शाळांची स्थापना केली.
निवेदनानुसार, या शाळांपैकी शाळा क्रमांक १० ही १८ सप्टेंबर १८४९ रोजी शिरूर येथे महात्मा ज्योतिराव फुले आणि क्रांतीज्योती सावित्रीबाई फुले यांनी सुरू केली होती. सध्या त्याच ठिकाणी नगरपरिषद प्राथमिक शाळा क्रमांक १ व २ कार्यरत असल्याने या ऐतिहासिक शाळेला ‘सत्यशोधक महात्मा ज्योतिराव फुले’ यांचे नाव देऊन त्यांच्या शैक्षणिक, सामाजिक आणि परिवर्तनवादी कार्याचा गौरव करण्यात यावा, अशी मागणी करण्यात आली आहे.
महात्मा फुले यांनी शिक्षणाचा अधिकार सर्व समाजघटकांसाठी खुला करत सामाजिक समता, स्त्री-पुरुष समानता आणि शिक्षणाच्या माध्यमातून समाजपरिवर्तनाचा पाया रचला. त्यामुळे या ऐतिहासिक शाळेचे नामकरण त्यांच्या नावाने करण्याचा निर्णय नगरपरिषदेकडून तातडीने घेण्यात यावा, असेही निवेदनात नमूद करण्यात आले आहे.
या निवेदनाची प्रत नगराध्यक्षा ऐश्वर्या अभिजीत पाचर्णे तसेच नगरसेविका व पाणीपुरवठा विभागाच्या सभापती डॉ. सुनिता पोटे यांना देण्यात आली. निवेदन देताना पुणे उपशहराध्यक्ष विनोद उर्फ पप्पू साठे, सामाजिक कार्यकर्ते रियाजभाई सय्यद, तुषारभाऊ भवाळ आणि शहराध्यक्ष सुमित बागवे उपस्थित होते.
