कुरुंदवाड | प्रतिनिधी
महायुती सरकारने महात्मा फुले जनआरोग्य योजना अधिक व्यापक आणि रुग्णकेंद्रित करण्याच्या दृष्टीने महत्त्वपूर्ण निर्णय घेतला आहे. या योजनेअंतर्गत आता पीईटी स्कॅनचा समावेश करण्यात येणार असून, पात्र रुग्णांना त्याचा लाभ मिळणार आहे. तसेच कर्करोगाशी संबंधित उपचारांसाठी आर्थिक सहाय्यही वाढविण्यात येणार असल्याची घोषणा सार्वजनिक आरोग्यमंत्री प्रकाश अबिटकर यांनी विधानसभेत केली.
आमदार प्रशांत ठाकूर यांनी उपस्थित केलेल्या लक्षवेधी सूचनेला उत्तर देताना आरोग्यमंत्र्यांनी सांगितले की, गंभीर आजारांवरील उपचार अधिक सुलभ, प्रभावी आणि सर्वसामान्यांना परवडणारे व्हावेत, यासाठी महात्मा फुले जनआरोग्य योजनेची व्याप्ती वाढविण्यात येत आहे. यामुळे आधुनिक निदान सुविधा आणि दर्जेदार उपचार अधिक रुग्णांपर्यंत पोहोचतील.
ग्रामीण भागातील नागरिकांनाही या योजनेचा अधिक प्रभावी लाभ मिळावा यासाठी योजनेशी संलग्न रुग्णालयांच्या पात्रता निकषांमध्ये आवश्यक बदल करण्यात येणार आहेत. त्यामुळे ग्रामीण भागातील रुग्णांना उपचारासाठी दूरवर जाण्याची गरज कमी होऊन आरोग्यसेवा अधिक सुलभ होण्याची अपेक्षा आहे.
याशिवाय राज्यातील धर्मादाय रुग्णालयांना महात्मा फुले जनआरोग्य योजनेशी जोडण्याचा सरकारचा प्रयत्न असल्याचेही मंत्री अबिटकर यांनी स्पष्ट केले. यामुळे अधिकाधिक रुग्णालयांमध्ये पात्र लाभार्थ्यांना मोफत व दर्जेदार उपचार उपलब्ध होतील.
सरकार नागरिकांना दर्जेदार आरोग्य सुविधा उपलब्ध करून देण्यासाठी सातत्याने प्रयत्नशील असून, या निर्णयामुळे महात्मा फुले जनआरोग्य योजनेचा लाभ अधिक व्यापक स्वरूपात राज्यातील रुग्णांपर्यंत पोहोचेल, अशी अपेक्षा व्यक्त केली जात आहे.
