परळी | प्रतिनिधी
महाराष्ट्र राज्य निवडणूक आयोगाकडून मतदार यादीतील नावांची पडताळणी मोहीम सुरू असताना परळी तालुक्यातील नागापूर येथे काही BLO (Booth Level Officer) प्रत्यक्ष मतदारांच्या घरी न जाता चौकात बसून फॉर्म भरत असल्याचा आरोप करण्यात आला आहे. यामुळे अनेक मतदार पडताळणीपासून वंचित राहण्याची शक्यता व्यक्त करण्यात येत आहे.
भारतीय दलित पॅंथर, महाराष्ट्र राज्यचे परळी तालुकाध्यक्ष माणिकराव बनसोडे यांनी प्रसिद्धीपत्रकाद्वारे हा आरोप करत संबंधित BLO यांच्या कामाची चौकशी करून तातडीने योग्य ती कारवाई करण्याची मागणी तहसीलदार, परळी वैजनाथ यांच्याकडे केली आहे.
बनसोडे यांनी म्हटले आहे की, निवडणूक आयोगाच्या नियमानुसार BLO यांनी प्रत्येक मतदाराच्या घरी जाऊन प्रत्यक्ष पडताळणी करून आवश्यक ऑनलाइन फॉर्म भरून घ्यावेत. मात्र नागापूरमध्ये प्रत्यक्ष घरोघरी न जाता रस्त्याच्या कडेला किंवा चौकात बसून काम सुरू असल्याचे प्रथमदर्शनी निदर्शनास आले आहे. त्यामुळे मतदारांमध्ये संभ्रम निर्माण झाला असून अनेक नागरिक पडताळणी प्रक्रियेपासून वंचित राहण्याची भीती व्यक्त केली जात आहे.
नागापूरमधील सर्व मतदारांच्या घरी जाऊन नियमानुसार पडताळणी व ऑनलाइन नोंदणी करण्यात यावी, अशी मागणीही त्यांनी केली आहे. तसेच पडताळणीअभावी एखादा मतदार मतदानाच्या हक्कापासून वंचित राहिल्यास त्याची जबाबदारी संबंधित यंत्रणा व निवडणूक प्रशासनाची राहील, असेही प्रसिद्धीपत्रकात नमूद करण्यात आले आहे.
