अस्तगाव | प्रतिनिधी
केंद्रप्रमुख विभागीय परीक्षेत यश संपादन करून शिर्डी येथे केंद्रप्रमुखपदी पदोन्नती मिळालेले जिल्हा परिषद प्राथमिक शाळा, डांगेवाडी येथील शिक्षक प्रविण खंडीझोड तसेच काकडी शाळेतील केंद्रप्रमुख सचिन घुसळे यांचा निरोप समारंभ डांगेवाडी येथे भावनिक वातावरणात पार पडला. यावेळी विद्यार्थी, पालक आणि ग्रामस्थ मोठ्या संख्येने उपस्थित होते. आपल्या लाडक्या शिक्षकाला निरोप देताना अनेक विद्यार्थ्यांसह ग्रामस्थांनाही अश्रू अनावर झाले.
प्रविण खंडीझोड हे गेल्या तीन वर्षांपासून डांगेवाडी शाळेत कार्यरत होते. अल्प कालावधीत त्यांनी शाळेच्या सर्वांगीण विकासासाठी उल्लेखनीय काम केले. शाळेचे रंगकाम, भौतिक सुविधा, इयत्ता पाचवीची वर्गवाढ, नवीन वर्गखोली, शौचालय, संगणक, इंटरॲक्टिव्ह बोर्ड यांसह शैक्षणिक गुणवत्तावाढीसाठी विविध उपक्रम राबविले.
त्यांच्या मार्गदर्शनाखाली सलग दोन वर्षे इयत्ता पाचवीचा १०० टक्के निकाल लागला. एका विद्यार्थ्याची सरस्वती अकॅडमी, लोणावळा (नवोदय समकक्ष) येथे निवड झाली, शिष्यवृत्ती परीक्षेत गुणवंत विद्यार्थी घडले तसेच जिल्हास्तरीय सांस्कृतिक स्पर्धेतही शाळेला यश मिळाले. केवळ २४ विद्यार्थीसंख्या असलेल्या डांगेवाडी शाळेचे नाव जिल्हाभर पोहोचविण्यात त्यांचे मोलाचे योगदान राहिले.
फेब्रुवारीमध्ये झालेल्या केंद्रप्रमुख विभागीय परीक्षेत १६१ गुण मिळवत राज्यात नववा क्रमांक मिळवल्याने त्यांची शिर्डी येथे केंद्रप्रमुख म्हणून नियुक्ती झाली.
कार्यक्रमाचे आयोजन मुख्याध्यापिका साळी मॅडम, शाळा व्यवस्थापन समिती, पालक व ग्रामस्थ यांनी केले होते. यावेळी दोन्ही सत्कारमूर्तींचा शाल, श्रीफळ, फेटा, पुष्पगुच्छ व पोशाख देऊन गौरव करण्यात आला. तसेच मागील वर्षी जिल्हास्तरीय स्पर्धेत तृतीय क्रमांक मिळविणाऱ्या शाळेतील १३ विद्यार्थ्यांचाही विशेष सन्मान करण्यात आला.
मनोगत व्यक्त करताना अनेक विद्यार्थी भावूक झाले. गावकऱ्यांनीही खंडीझोड सरांनी शाळेसाठी केलेल्या कार्याची आठवण सांगत त्यांना भावपूर्ण निरोप दिला. आपल्या मनोगतात खंडीझोड यांनी डांगेवाडीकरांचे प्रेम आयुष्यभर स्मरणात राहील, असे सांगत शाळेच्या विकासकामांसाठी ११ हजार रुपयांची देणगी जाहीर केली. तसेच या यशामध्ये माजी मुख्याध्यापक झोडगे सर, प्रविण त्रिभुवन सर आणि मुख्याध्यापिका साळी मॅडम यांचे मोलाचे योगदान असल्याचे त्यांनी नमूद केले.
यावेळी एसएमसी अध्यक्ष दत्तू कांदळकर, वाल्मीक बडे, माळी सर, शिरोळे सर, गणेश कांदळकर, साईनाथ कांडेकर, बाबासाहेब कांडेकर, संतोष चांदगुडे, बापू कदम, सुभाष कांडेकर, सुजित पवार, प्रकाश वामन, लता कांडेकर, पूजा कांडेकर, मंदा कांदळकर, आरती कांडेकर यांच्यासह पालक व ग्रामस्थ मोठ्या संख्येने उपस्थित होते.
कार्यक्रमाचे अध्यक्षस्थान ज्येष्ठ नागरिक विठ्ठल बाबा कांडेकर यांनी भूषविले. मुख्याध्यापिका साळी मॅडम यांनी सूत्रसंचालन केले, तर गोकुळ कांडेकर यांनी उपस्थितांसाठी मिष्टान्न भोजनाची व्यवस्था केली.
