लोणी काळभोर | प्रतिनिधी
ज्ञानोबा-तुकाराम आणि विठ्ठल नामाच्या अखंड जयघोषात, टाळ-मृदुंगाच्या निनादात जगद्गुरु संत तुकाराम महाराजांच्या पालखी सोहळ्याचे लोणी काळभोर (कदमवस्ती) येथे शनिवारी (११ जुलै) सायंकाळी भक्तिमय वातावरणात उत्स्फूर्त स्वागत करण्यात आले. पुण्यातील दोन दिवसांचा मुक्काम पूर्ण करून पालखी सोहळा लोणी काळभोर येथे विसावला.
पालखी आगमनावेळी हजारो वारकरी, दिंड्या आणि भाविकांच्या उपस्थितीने संपूर्ण परिसर विठ्ठलमय झाला होता. “ज्ञानोबा-तुकाराम” आणि “जय जय राम कृष्ण हरी”च्या गजराने वातावरण भक्तिरसाने भारावून गेले.
वारकऱ्यांच्या सोयीसाठी प्रशासनाने पालखीतळावर सुमारे १५ हजार चौरस फुटांचा भव्य जर्मन हँगर मंडप उभारला आहे. तसेच महिला वारकऱ्यांसाठी स्वतंत्र बंदिस्त स्नानगृहे, शुद्ध पिण्याच्या पाण्याची व्यवस्था, मोबाईल चार्जिंग सुविधा आदी आवश्यक सोयी उपलब्ध करून देण्यात आल्या.
लाखो वारकऱ्यांच्या उपस्थितीमुळे लोणी काळभोर परिसरात उत्साहाचे आणि भक्तीचे वातावरण निर्माण झाले. स्थानिक नागरिकांनीही पालखी सोहळ्याचे स्वागत करत वारकऱ्यांसाठी विविध सेवा-सुविधा उपलब्ध करून दिल्या.
वारकऱ्यांनी सांगितले की, संत तुकाराम महाराजांच्या पालखी सोहळ्यात सहभागी होण्याचा अनुभव अत्यंत समाधानकारक असून, विठ्ठल नामस्मरणामुळे मनाला शांतता आणि आध्यात्मिक ऊर्जा मिळते. “ज्ञानोबा-तुकाराम”च्या अखंड जयघोषाने संपूर्ण परिसर भक्तिमय झाला होता.
