भिलवडी | प्रतिनिधी
भिलवडी येथील सेकंडरी स्कूल अँड ज्युनिअर कॉलेजमध्ये भौतिकशास्त्र विषयातील आंतरराष्ट्रीय ख्यातीचे तज्ज्ञ तथा आयआयटी कानपूरचे प्रा. डॉ. एच. सी. वर्मा यांच्या कृतीयुक्त मार्गदर्शनपर व्याख्यानाचे आयोजन SSB-IAPT, भिलवडी यांच्या सहकार्याने करण्यात आले. विद्यार्थी, शिक्षक आणि शिक्षणप्रेमींसाठी हा कार्यक्रम प्रेरणादायी ठरला.
सकाळच्या सत्रात प्रा. वर्मा यांनी विद्यार्थ्यांशी संवाद साधत विविध प्रयोगांच्या माध्यमातून विज्ञान विषय सोप्या आणि आनंददायी पद्धतीने कसा शिकवता येतो, याचे प्रात्यक्षिक सादर केले. या सत्राला माध्यमिक व उच्च माध्यमिक विभागातील विद्यार्थी, इंग्लिश मीडियम स्कूलचे विद्यार्थी तसेच परिसरातील विविध महाविद्यालयांतील विद्यार्थी मोठ्या संख्येने उपस्थित होते.
दुसऱ्या सत्रात शिक्षक, शिक्षणतज्ज्ञ आणि मान्यवरांसाठी विशेष व्याख्यानाचे आयोजन करण्यात आले. सरस्वती पूजन आणि विद्युत ज्ञानज्योती प्रज्वलनाने कार्यक्रमाची सुरुवात झाली.
दीड तासांच्या मार्गदर्शनात प्रा. डॉ. वर्मा यांनी शिक्षकांनी विद्यार्थ्यांना कृतीयुक्त अध्यापनाद्वारे सक्षम बनवावे, असे आवाहन केले. “डॉक्टर आणि अभियंत्यांपेक्षा समाजाला चांगल्या शिक्षकांची अधिक गरज आहे,” असे सांगत त्यांनी विद्यार्थ्यांना आव्हाने स्वीकारण्याची सवय लावावी, अभ्यासातील शॉर्टकट टाळावेत आणि संकल्पनात्मक शिक्षणावर भर द्यावा, असा संदेश दिला.
कार्यक्रमाच्या अध्यक्षस्थानी भिलवडी शिक्षण संस्थेचे संचालक मुकुंद जोग होते. त्यांनी आपल्या अध्यक्षीय भाषणात प्रा. वर्मा यांच्या विचारांमधून मिळालेल्या प्रेरणेच्या बळावर शैक्षणिक वाटचाल अधिक प्रभावी करण्याचा निर्धार व्यक्त केला.
विद्यालयाचे मुख्याध्यापक एस. एस. मोरे यांनी प्रा. वर्मा यांची भेट ही संस्थेसाठी भाग्याची बाब असल्याचे सांगून या कार्यक्रमाचे उत्कृष्ट नियोजन करणारे प्रा. डॉ. जी. बी. पाटील यांचे विशेष आभार मानले.
कार्यक्रमाचे स्वागत व प्रास्ताविक संस्थेचे सहसचिव के. डी. पाटील आणि प्रा. जी. बी. पाटील यांनी केले. प्रमुख पाहुण्यांचा परिचय उपमुख्याध्यापिका सौ. शिंदे यांनी करून दिला. सूत्रसंचालन सौ. भाग्यश्री सूर्यवंशी यांनी केले, तर आभार प्रदर्शन प्रा. एम. एस. पुजारी यांनी केले.
या कार्यक्रमाला संस्थेच्या सर्व विभागांतील शिक्षक, परिसरातील ग्रामस्थ, शिक्षणप्रेमी आणि विद्यार्थी मोठ्या संख्येने उपस्थित होते.
