खुंटेफळ | प्रतिनिधी
ग्रामीण भागातील नागरिकांना बँकिंग सेवा गावातच उपलब्ध करून देण्यासाठी लातूर जिल्हा मध्यवर्ती सहकारी (DCC) बँकेच्या वतीने ‘बँक आपल्या दारी’ उपक्रमांतर्गत खुंटेफळ गावात प्रथमच एटीएम व्हॅनची सेवा सुरू करण्यात आली आहे.
युवा काँग्रेस कार्यकर्ते गंगाराम भैय्या जाधव यांनी गावातील ज्येष्ठ नागरिक, निराधार लाभार्थी आणि महिलांना बँकेच्या कामासाठी लातूरला जावे लागत असल्याची अडचण लातूर जिल्हा मध्यवर्ती सहकारी बँकेचे अध्यक्ष तथा माजी आमदार धीरज भैय्या देशमुख यांच्या निदर्शनास आणून दिली होती. या मागणीची दखल घेत देशमुख यांनी तातडीने मंजुरी देत खुंटेफळ येथे एटीएम व्हॅन सेवा सुरू करण्याचा निर्णय घेतला.
या एटीएम व्हॅनच्या माध्यमातून लाडकी बहीण योजनेचे लाभ, निराधार योजनेचे अनुदान तसेच बचत खात्यातून रोख रक्कम काढण्याची सुविधा गावकऱ्यांना उपलब्ध होणार आहे.
बँकेने दिलेल्या माहितीनुसार, लाभार्थ्यांनी एटीएम व्हॅनकडे येताना बँक पासबुक सोबत आणणे आवश्यक असून, एका व्यवहारात कमाल १० हजार रुपये काढता येणार आहेत.
या सुविधेमुळे गावकऱ्यांचा वेळ आणि प्रवासाचा खर्च वाचणार असून, ग्रामीण भागातील नागरिकांना बँकिंग सेवा अधिक सुलभ होणार असल्याची भावना ग्रामस्थांनी व्यक्त केली आहे. तसेच या उपक्रमासाठी गंगाराम भैय्या जाधव यांच्या पाठपुराव्याचे आणि धीरज भैय्या देशमुख यांच्या पुढाकाराचे ग्रामस्थांनी स्वागत करत आभार व्यक्त केले आहेत.
