श्रीगोंदा | प्रतिनिधी
“आपले शरीर हे आपले असून त्यावर आपलाच हक्क आहे. आपल्या परवानगीशिवाय कोणालाही स्पर्श करण्याचा अधिकार नाही. आई-वडिलांच्या प्रेमळ स्पर्शाव्यतिरिक्त अनोळखी व्यक्तींच्या आमिषाला बळी पडू नका, कारण त्यामुळे तुमच्या सुरक्षिततेला धोका निर्माण होऊ शकतो,” असे प्रतिपादन लोणी व्यंकनाथ प्राथमिक आरोग्य केंद्राच्या वैद्यकीय अधिकारी डॉ. स्नेहल गायकवाड यांनी केले.
मढेवडगाव येथील जिल्हा परिषद उंडेमळा शाळेत किशोरवयीन मुली, विद्यार्थिनी तसेच माता-पालकांसाठी आयोजित बालप्रबोधन, समुपदेशन व निरोगी आरोग्य या विषयावरील व्याख्यानात त्या बोलत होत्या. कार्यक्रमाच्या अध्यक्षस्थानी शालेय व्यवस्थापन समितीचे अध्यक्ष मनोज सुपेकर होते. प्रास्ताविक मुख्याध्यापक रामदास ठाकर यांनी केले.
डॉ. गायकवाड यांनी विद्यार्थ्यांना चांगल्या आणि अयोग्य स्पर्शाविषयी जागरूक राहण्याचे आवाहन करत सुरक्षिततेबाबत आवश्यक खबरदारी घेण्याचा सल्ला दिला. तसेच नियमित व्यायाम, संतुलित आहार, पालेभाज्या व फळांचा आहारात समावेश केल्यास उत्तम आरोग्य राखता येते, असेही त्यांनी सांगितले.
यावेळी सहकारमहर्षी नागवडे कारखान्याचे शेतकी अधिकारी निळकंठ उंडे आणि ग्रामपंचायत सदस्य नवनाथ उंडे यांनीही मनोगत व्यक्त केले.
कार्यक्रमास आरोग्य सहाय्यक एस. एम. नागरगोजे, शालेय व्यवस्थापन समितीच्या उपाध्यक्षा श्रद्धा गायकवाड, जगदेव उंडे, महेश शिंदे, सुवर्णा शिंदे, सविता मांडे, अलका वाबळे, रोहिणी वाबळे, सुलोचना मांडे, आरोग्य सेविका पूजा शिंदे, कविता शेलार, आशासेविका रेवती खेतमाळीस, रोहित कार्ले यांच्यासह पालक व ग्रामस्थ उपस्थित होते.
कार्यक्रमाचे सूत्रसंचालन संतोष इंगावले यांनी केले, तर नवनाथ उंडे यांनी उपस्थितांचे आभार मानले.
