श्रीगोंदा | प्रतिनिधी
सहकार चळवळीचा समृद्ध वारसा जपणारी श्रीगोंदा तालुक्यातील चांभुर्डी येथील विठ्ठल विविध कार्यकारी सेवा सहकारी संस्था शताब्दी वर्षाच्या उंबरठ्यावर उभी असतानाही आजपर्यंत स्वतःच्या हक्काच्या इमारतीपासून वंचित आहे. तब्बल २३ डिसेंबर १९२८ रोजी स्थापन झालेल्या या संस्थेला ९८ वर्षे पूर्ण झाली असून, आजही तिचा कारभार भाड्याच्या जागेतून चालत असल्याने शेतकरी सभासदांमध्ये नाराजी व्यक्त होत आहे.
भाड्याच्या जागेतून सुरू कारभार
शेकडो शेतकरी सभासद असलेल्या या संस्थेचे दैनंदिन कामकाज आजही भाड्याच्या खोलीतून सुरू आहे. महत्त्वाची कागदपत्रे, कर्ज वाटपाच्या फाईल्स आणि दप्तर सुरक्षित ठेवण्यासाठी पुरेशी जागा नसल्याने संस्थेच्या कामकाजात अडचणी निर्माण होत आहेत. जागा बदलण्याची वेळ वारंवार येत असल्याने सभासदांचीही गैरसोय होत आहे.
दस्तऐवजांच्या सुरक्षेचा प्रश्न
शेतकऱ्यांचे कर्ज प्रस्ताव, ७/१२ उतारे तसेच गोपनीय आर्थिक कागदपत्रे सुरक्षित ठेवण्यासाठी आवश्यक सुविधा उपलब्ध नसल्याचे सांगितले जात आहे. पिककर्ज वाटपाचा हंगाम किंवा वार्षिक सर्वसाधारण सभेच्या वेळी सभासदांना बसण्यासाठीही पुरेशी जागा उपलब्ध नसल्याने अडचणी वाढतात.
लोकप्रतिनिधींच्या भूमिकेवर प्रश्नचिन्ह
चांभुर्डी गावातील सहकार आणि ग्रामपंचायत राजकारण तालुक्यात नेहमीच चर्चेचा विषय राहिले आहे. गावातून अनेक लोकप्रतिनिधी आणि सहकार क्षेत्रातील पदाधिकारी घडले, मात्र ९८ वर्षे पूर्ण झालेल्या या ऐतिहासिक संस्थेला स्वतःची जागा किंवा शासकीय निधीतून इमारत मिळवून देण्यात अद्याप यश आलेले नाही. त्यामुळे स्थानिक पातळीवर पाठपुरावा कमी पडला का, असा प्रश्न ग्रामस्थ उपस्थित करत आहेत.
शताब्दीपूर्वी हक्काची इमारत उभारण्याची मागणी
विठ्ठल विविध कार्यकारी सेवा सहकारी संस्था ही केवळ एक सहकारी संस्था नसून चांभुर्डी गावाच्या सहकार परंपरेचा ऐतिहासिक वारसा आहे. शताब्दी वर्षात प्रवेश करण्यापूर्वी संस्थेला सुसज्ज आणि कायमस्वरूपी इमारत मिळावी, यासाठी विद्यमान संचालक मंडळ, स्थानिक लोकप्रतिनिधी आणि अहमदनगर जिल्हा मध्यवर्ती सहकारी बँक (ADCC) यांनी पुढाकार घेऊन जागा व निधीचा प्रश्न तातडीने मार्गी लावावा, अशी मागणी शेतकरी सभासदांकडून करण्यात येत आहे.
