लातूर | प्रतिनिधी
उदगीर मतदारसंघाचे आमदार संजयजी बनसोडे यांच्या वाढदिवसानिमित्त उदगीर येथील शासकीय विश्रामगृहात अभिष्टचिंतन सोहळा उत्साहात पार पडला. यावेळी विविध क्षेत्रांतील मान्यवर, पत्रकार, सामाजिक कार्यकर्ते, सरपंच तसेच नागरिकांनी उपस्थित राहून त्यांना वाढदिवसाच्या शुभेच्छा दिल्या.
कार्यक्रमाला गोविंद अण्णा केंद्रे, उदगीरचे नगराध्यक्ष सचिन हुडे, उषाताई कांबळे, रामराव मामा, उपनगराध्यक्ष ज्ञानेश्वर बिरादार, शिंदे ताई यांच्यासह विविध क्षेत्रांतील मान्यवरांची उपस्थिती लाभली.
यावेळी वक्त्यांनी आमदार संजयजी बनसोडे यांच्या उदगीर शहर व मतदारसंघाच्या विकासातील योगदानाचा गौरव केला. विकासकामांमुळे परिसरात सकारात्मक बदल घडत असल्याचे सांगत त्यांच्या पुढील वाटचालीस शुभेच्छा व्यक्त करण्यात आल्या.
पुष्पगुच्छाऐवजी शालेय साहित्याची भेट
यंदाच्या वाढदिवस सोहळ्याचे वैशिष्ट्य म्हणजे उपस्थितांनी पुष्पगुच्छ किंवा हार देण्याऐवजी विद्यार्थ्यांसाठी उपयुक्त शालेय साहित्य भेट देत सामाजिक बांधिलकीचा संदेश दिला. या उपक्रमाचे उपस्थितांकडून स्वागत करण्यात आले असून शिक्षणाला प्रोत्साहन देणारा हा आदर्श उपक्रम असल्याचे मत व्यक्त करण्यात आले.
सामाजिक जाणीव जपत साजरा करण्यात आलेल्या या अभिष्टचिंतन सोहळ्यामुळे उपस्थितांमध्ये समाधानाचे वातावरण निर्माण झाले.
