लोणी | प्रतिनिधी
आंबेगाव तालुक्यातील लोणी येथील श्री भैरवनाथ विद्याधाम प्रशालेला उपमुख्यमंत्री तथा सार्वजनिक बांधकाम मंत्री एकनाथ शिंदे यांच्या कार्यालयातील सहसचिव व्यंकटेश भट, आरोग्यमंत्री प्रकाश आबिटकर यांचे सहसचिव मंगेश शिंदे, गृह विभागाचे अवर सचिव बोरसे तसेच महिला अधिकाऱ्यांच्या शिष्टमंडळाने सदिच्छा भेट दिली. यावेळी शाळेच्या परिसरात राबविण्यात आलेल्या वृक्षारोपण उपक्रमाची पाहणी करून विद्यार्थ्यांच्या प्रयत्नांचे कौतुक करण्यात आले.
भेटीदरम्यान शाळेचे मुख्याध्यापक थोरात सर व शिक्षकवृंद यांनी मान्यवरांचे स्वागत केले. कार्यक्रमास शाळेचे माजी विद्यार्थी, विकास प्रबोधिनीचे मार्गदर्शक व महसूल विभागातील सहसचिव कैलास गायकवाड, उपसरपंच राजूशेठ वाळुंज, पिंटूशेठ पडवळ, प्रकाशजी वाळुंज, साकोरे सर, शिवाजी नाना सिनलकर, बबनदादा वाळुंज, पोलीस अकादमीचे पडवळ सर, शिक्षक, ग्रामस्थ आणि विद्यार्थी मोठ्या संख्येने उपस्थित होते.
यावेळी सहसचिव व्यंकटेश भट यांनी विद्यार्थ्यांशी संवाद साधत शिक्षणाचे महत्त्व अधोरेखित केले. “जीवनात अनेक आव्हाने आणि अडचणी येतात. मात्र त्यांना धैर्याने सामोरे जात सातत्याने प्रयत्न करत राहिल्यास यश निश्चित मिळते. अपयश ही यशाची पहिली पायरी असून मेहनत, शिस्त आणि चिकाटीच्या बळावर कोणतेही ध्येय गाठता येते,” असा प्रेरणादायी संदेश त्यांनी विद्यार्थ्यांना दिला.
मान्यवरांनी शाळेत राबविण्यात येत असलेल्या वृक्षारोपण उपक्रमाचे विशेष कौतुक करत विद्यार्थ्यांनी पर्यावरण संवर्धनासाठी सक्रिय सहभाग घ्यावा, असे आवाहन केले. शिक्षणासोबतच सामाजिक बांधिलकी आणि पर्यावरणाविषयीची जाणीव जोपासण्याचे महत्त्वही त्यांनी अधोरेखित केले.
कार्यक्रमाच्या शेवटी मुख्याध्यापक थोरात सर यांनी उपस्थित मान्यवरांचे आभार मानले. विद्यार्थ्यांना मिळालेले हे प्रेरणादायी मार्गदर्शन त्यांच्या शैक्षणिक तसेच वैयक्तिक विकासासाठी निश्चितच उपयुक्त ठरेल, असा विश्वास यावेळी व्यक्त करण्यात आला.
