गडचिरोली | प्रतिनिधी
गडचिरोली जिल्ह्यातील एटापल्ली तालुक्यात नक्षलवादी आशयाचे बॅनर आणि पत्रके आढळून आल्याने परिसरात खळबळ उडाली असून, सुरक्षा यंत्रणांनी शोधमोहीम तीव्र केली आहे. या पत्रकांमध्ये खाण प्रकल्पांशी संबंधित काही कंपन्यांचा उल्लेख करून त्यांचे काम बंद करण्याचे आवाहन करण्यात आले असल्याची माहिती समोर आली आहे.
मिळालेल्या माहितीनुसार, एटापल्ली तालुक्यातील पिपली बुर्गी उपपोलीस ठाण्याच्या हद्दीतील कुंडम गावाजवळ रविवारी दोन ठिकाणी नक्षलवादी आशयाचे बॅनर व पत्रके आढळून आली. माहिती मिळताच पोलिसांनी घटनास्थळी धाव घेत बॅनर व पत्रके जप्त केली. या घटनेनंतर छत्तीसगड सीमेलगतच्या भागात सुरक्षा व्यवस्था वाढविण्यात आली असून, पोलिसांकडून शोधमोहीम सुरू करण्यात आली आहे.
राज्य शासनाने गडचिरोली जिल्ह्याला औद्योगिकदृष्ट्या विकसित करण्याच्या धोरणाअंतर्गत विविध खाण प्रकल्पांना गती दिली आहे. एटापल्ली परिसरातही लोहखनिज साठ्यांचे सर्वेक्षण सुरू असताना समोर आलेल्या पत्रकांमध्ये काही कंपन्यांचा उल्लेख करून त्यांचे काम थांबविण्याचे आवाहन करण्यात आले आहे. तसेच हेटळकसा, कुदरी आणि मोहरली परिसरात सुरू असलेल्या ड्रोन सर्वेक्षणालाही विरोध दर्शविण्यात आल्याचे प्राथमिक माहितीतून समोर आले आहे.
पत्रकांमध्ये जल, जंगल आणि जमीन यासंदर्भातील मुद्दे उपस्थित करण्यात आले असून स्थानिक नागरिकांना आंदोलनासाठी प्रवृत्त करण्याचा प्रयत्न करण्यात आल्याचे पोलिसांच्या निदर्शनास आले आहे. तसेच संबंधित कंपन्यांना सहकार्य करणाऱ्या स्थानिक पदाधिकाऱ्यांबाबतही धमकीवजा मजकूर असल्याचे सांगण्यात येत आहे.
दरम्यान, या प्रकरणाची सखोल चौकशी सुरू असून बॅनर व पत्रके नेमकी कोणी लावली, त्यामागे कोणाचा सहभाग आहे, याचा तपास पोलिसांकडून केला जात आहे.
पोलीस अधीक्षक एम. रमेश यांनी सांगितले की, “पिपली बुर्गी परिसरात आढळलेल्या बॅनर आणि पत्रकांची चौकशी सुरू आहे. ती प्रत्यक्षात नक्षलवाद्यांनीच लावली आहेत का, याची खातरजमा करण्यात येत आहे.”
