अहेरी | प्रतिनिधी
गडचिरोली जिल्ह्यातील अहेरी पोलीस ठाण्याच्या हद्दीत अमली पदार्थांविरोधात पोलिसांनी मोठी कारवाई करत आलापल्ली येथील एका पानटपरीवरून गांजा विक्री करणाऱ्या एका आरोपीला अटक केली. या कारवाईत ३२ हजार ४०० रुपयांचा मुद्देमाल जप्त करण्यात आला आहे.
नेमकी कारवाई
१२ जुलै २०२६ रोजी पहाटे सुमारे १.३० वाजता अहेरी पोलिसांनी आलापल्ली येथील ‘गोपाल पान सेंटर’ येथे छापा टाकला. या कारवाईदरम्यान गोपाल नवकुमार बिश्वास (वय ४५, रा. बस स्टॉपसमोर, आलापल्ली) याच्या दुकानातून १.६२२ किलो गांजा (पाने, फुले व बोंडे) तसेच गांजा सेवनासाठी वापरल्या जाणाऱ्या ४० मातीच्या चिलमी जप्त करण्यात आल्या.
गुन्हा दाखल
आरोपी हा आर्थिक फायद्यासाठी विक्रीच्या उद्देशाने प्रतिबंधित अमली पदार्थ बेकायदेशीररीत्या बाळगत असल्याचे तपासात समोर आले. याप्रकरणी सपोनि देवेंद्र चुनीलाल पटले यांच्या फिर्यादीवरून अहेरी पोलीस ठाण्यात NDPS अधिनियम, १९८५ अंतर्गत कलम ८(क) व २०(ब)(ii)(ब) अन्वये गुन्हा दाखल करण्यात आला आहे.
या प्रकरणाचा पुढील तपास सपोनि मंगेश गिब्बा वळवी यांच्या मार्गदर्शनाखाली सुरू असून, अहेरी परिसरातील अमली पदार्थांच्या अवैध व्यापाराविरोधात पोलिसांची कारवाई आणखी तीव्र करण्यात येणार असल्याचे सांगण्यात आले आहे.
