करमाळा | प्रतिनिधी :
करमाळा तालुक्यातील प्रवासी आणि विद्यार्थ्यांची गैरसोय दूर करण्याच्या दृष्टीने करमाळा एसटी डेपोच्या ताफ्यात ५ नवीन ‘लाल परी’ (एसटी बस) दाखल झाल्या आहेत. या नवीन बसचे पूजन करमाळा तालुक्याचे आमदार नारायण पाटील यांच्या हस्ते उत्साहात पार पडले.
नवीन बस दाखल झाल्याने विशेषतः ग्रामीण भागातील प्रवासी आणि विद्यार्थ्यांना मोठा दिलासा मिळणार असून, वाहतुकीची सुविधा अधिक सक्षम होणार आहे.
यावेळी बोलताना आमदार नारायण पाटील म्हणाले की, “ग्रामीण भागातील जनतेची आणि विद्यार्थ्यांची जीवनवाहिनी म्हणजे एसटी बस आहे. गेल्या काही दिवसांपासून बस फेऱ्या अपुऱ्या असल्याने नागरिकांना, विशेषतः विद्यार्थ्यांना मोठ्या अडचणींचा सामना करावा लागत होता. ही बाब लक्षात घेऊन परिवहन विभागाकडे सातत्याने पाठपुरावा केला आणि अखेर करमाळा डेपोसाठी ५ नवीन बस मंजूर करण्यात आल्या. या बसमुळे ग्रामीण भागातील वाहतूक व्यवस्था अधिक सक्षम होईल आणि प्रवाशांना दर्जेदार सेवा मिळेल.”
डेपोमध्ये बसची संख्या वाढल्याने अनेक रखडलेल्या ग्रामीण फेऱ्या पुन्हा नियमित सुरू करण्यास मदत होणार आहे. तसेच शाळा व महाविद्यालयांच्या वेळेत विद्यार्थ्यांची होणारी गर्दी कमी होऊन प्रवास अधिक सुरक्षित आणि सोयीस्कर होणार असल्याची अपेक्षा व्यक्त करण्यात येत आहे.
नवीन बसमुळे ग्रामीण भागातील नागरिक, विद्यार्थी आणि पालकांनी समाधान व्यक्त करत आमदार नारायण पाटील यांच्या पाठपुराव्याचे स्वागत केले.
या प्रसंगी करमाळा एसटी डेपोचे आगार व्यवस्थापक प्रमोद शिंदे, वाहतूक नियंत्रक, एसटी महामंडळाचे अधिकारी, कर्मचारी, चालक-वाहक तसेच स्थानिक पदाधिकारी आणि नागरिक मोठ्या संख्येने उपस्थित होते.
