बेलापूर | प्रतिनिधी
बेलापूरच्या आमदार सौ. मंदाताई म्हात्रे यांची फेस्कॉम मुंबई विभाग आणि ज्येष्ठ नागरिक संघाच्या पदाधिकाऱ्यांनी सदिच्छा भेट घेतली. यावेळी ज्येष्ठ नागरिकांच्या ११ प्रलंबित मागण्यांचे निवेदन त्यांना सादर करण्यात आले.
फेस्कॉम मुंबई विभागाचे अध्यक्ष सुरेश पोटे, ज्येष्ठ नागरिक संघाचे अध्यक्ष विकास साठे आणि सचिव अजय माढेकर यांच्या नेतृत्वाखालील शिष्टमंडळाने आमदार मंदाताई म्हात्रे यांची भेट घेऊन विविध प्रलंबित प्रश्नांवर चर्चा केली.
यावेळी सुरेश पोटे यांनी आमदार मंदाताई म्हात्रे यांनी ज्येष्ठ नागरिकांच्या हितासाठी केलेल्या कार्याचे कौतुक करत त्यांचा सन्मानचिन्ह व पुष्पगुच्छ देऊन सत्कार केला.
निवेदन स्वीकारताना आमदार मंदाताई म्हात्रे यांनी ज्येष्ठ नागरिकांच्या सर्व मागण्या गांभीर्याने ऐकून घेतल्या. “ज्येष्ठ नागरिक हे समाजाचा आधारस्तंभ आहेत. फेस्कॉमच्या ११ प्रलंबित मागण्या मुख्यमंत्री स्तरावर मांडून त्या लवकरात लवकर मार्गी लावण्यासाठी सातत्याने पाठपुरावा करणार,” असे आश्वासन त्यांनी दिले.
आमदारांच्या सकारात्मक भूमिकेमुळे उपस्थित ज्येष्ठ नागरिकांनी समाधान व्यक्त केले. या भेटीप्रसंगी फेस्कॉमचे पदाधिकारी, ज्येष्ठ नागरिक संघाचे सदस्य तसेच मोठ्या संख्येने ज्येष्ठ नागरिक उपस्थित होते.
