फलटण | प्रतिनिधी
फलटण तालुक्यातील पिंपोडे बुद्रुक येथील श्री घुमाई देवी मंदिर परिसरातील दरीतून दरवर्षी मोठ्या प्रमाणात पावसाचे पाणी तांबवे धरणाकडे वाहून जात असल्याने हे पाणी अडवून गावाच्या सिंचनासाठी वापरण्याची मागणी स्थानिकांकडून करण्यात येत आहे. यासाठी ‘श्री घुमाई देवी उपसा सिंचन योजना’ राबविण्याचा प्रस्ताव पुढे आला आहे.
प्रस्तावानुसार, दरीच्या मुख्य प्रवाहात योग्य ठिकाणी कोल्हापुरी पद्धतीचे (KT Weir) किंवा साखळी सिमेंट बंधारे उभारून पावसाचे वाहून जाणारे पाणी अडविण्यात यावे. यामुळे भूजल पातळी वाढण्यास मदत होईल तसेच परिसरातील विहिरींच्या पाणीसाठ्यात वाढ होण्याची अपेक्षा आहे.
तसेच दरीत मुख्य साठवण तलाव किंवा विहीर उभारून तेथील पाणी उपसा सिंचन (Lift Irrigation) पद्धतीने पंपाच्या साहाय्याने उंच भागात नेण्याचा प्रस्ताव आहे. सुमारे साडेतीन किलोमीटर लांबीच्या पाइपलाइनद्वारे हे पाणी भावेनगरजवळील खिलटाणा डोंगराच्या पायथ्याशी आणून तेथून पिंपोडे बुद्रुक येथील काटा धरण तसेच परगणा व इनाम शिवाराकडे जाणाऱ्या श्री घुमाई देवी ओढ्याच्या उगमस्थानी सोडण्याची योजना मांडण्यात आली आहे.
या योजनेची अंमलबजावणी झाल्यास गावाच्या उत्तर, पूर्व आणि पश्चिम भागातील शेतीला सिंचनासाठी पाणी उपलब्ध होईल. तसेच सध्या तांबवे धरणाकडे वाहून जाणाऱ्या पाण्याचा स्थानिक पातळीवर उपयोग होऊन विहिरींच्या पाणीसाठ्यात वाढ होण्यास मदत मिळेल, असा विश्वास व्यक्त केला जात आहे.
दरम्यान, प्रस्तावित कामांपैकी काही भाग वनक्षेत्राशी संबंधित असल्याने योजना राबविण्यापूर्वी वन विभागासह संबंधित शासकीय विभागांची आवश्यक परवानगी व तांत्रिक मान्यता घेणे आवश्यक असल्याचेही सांगण्यात येत आहे.
