नेर | प्रतिनिधी
यवतमाळ जिल्ह्यातील नेर तालुक्यातील कुलूर येथे कौटुंबिक वादातून सासऱ्याने जावयाची कुऱ्हाडीने हत्या केल्याची धक्कादायक घटना बुधवारी (१५ जुलै) सकाळी घडली. या घटनेमुळे परिसरात एकच खळबळ उडाली असून पोलिसांनी आरोपीला तातडीने अटक केली आहे.
मृताचे नाव शंकर मसाराम मस्के (वय 35, रा. कुंभारी, ता. पुसद) असे आहे. तो पत्नीसह नेर येथील अशोकनगर परिसरात भाड्याच्या घरात राहत होता.
पोलिसांनी दिलेल्या माहितीनुसार, मंगळवारी रात्री शंकर दारूच्या नशेत घरी आला आणि पत्नीशी वाद घातला. त्यानंतर पत्नी माहेरी कुलूर येथे निघून गेली. बुधवारी सकाळी सुमारे 9 वाजण्याच्या सुमारास शंकर पत्नीला घेण्यासाठी कुलूर येथे गेला. यावेळी रामनाथ बाबा मंदिराजवळ त्याचा सासरा रामनाथ किशन कवडे (वय 60, रा. कुलूर) यांच्याशी वाद झाला.
वाद विकोपाला गेल्यानंतर संतापाच्या भरात रामनाथ कवडे यांनी कुऱ्हाडीने शंकरच्या मानेवर व शरीरावर वार केले. गंभीर जखमी झालेल्या शंकरचा घटनास्थळीच मृत्यू झाला.
प्राथमिक तपासात समोर आलेल्या माहितीनुसार, काही वर्षांपूर्वी शंकरने रामनाथ कवडे यांच्या मुलीसोबत प्रेमविवाह केला होता. सुरुवातीला संसार सुरळीत सुरू असला तरी शंकर दारूच्या नशेत पत्नीला वारंवार त्रास देत असल्याने दोन्ही कुटुंबांमध्ये तणाव निर्माण झाला होता. त्यातूनच ही घटना घडल्याची माहिती समोर येत आहे.
या प्रकरणी अर्चना गजानन कवडे (रा. कुलूर) यांच्या फिर्यादीवरून नेर पोलिसांनी आरोपीविरुद्ध खुनाचा गुन्हा दाखल केला असून त्याला अटक करण्यात आली आहे. पुढील तपास नेर पोलीस करीत आहेत.
