लोणी काळभोर | प्रतिनिधी
पुणे जिल्ह्यातील प्रसिद्ध तीर्थक्षेत्र श्री रामदारा शिवालय मंदिराचे गर्भगृह आणि मंदिर परिसरातील नूतनीकरणाचे काम अद्याप पूर्ण न झाल्याने मंदिरातील दर्शनावरील बंदी १ सप्टेंबरपर्यंत वाढविण्यात आली आहे. त्यामुळे भाविकांना दर्शनासाठी आणखी प्रतीक्षा करावी लागणार आहे.
यापूर्वी मंदिर प्रशासनाने नूतनीकरणाचे काम १८ जुलैपर्यंत पूर्ण होऊन मंदिर भाविकांसाठी खुले करण्यात येईल, अशी माहिती दिली होती. मात्र, गर्भगृहातील तांत्रिक कामे आणि डागडुजीची कामे अद्याप सुरू असल्याने सुरक्षिततेच्या दृष्टीने मंदिर बंद ठेवण्याचा निर्णय घेण्यात आला आहे.
तीर्थक्षेत्र रामदारा शिवालय ट्रस्टचे अध्यक्ष १००८ श्री महंत हेमंत पुरी महाराज यांच्या मार्गदर्शनाखाली हा निर्णय घेण्यात आला. मंदिराच्या मुख्य गर्भगृहासह इतर भागांमध्ये क्लिष्ट स्वरूपाची दुरुस्ती सुरू असून, बांधकाम सुरू असताना भाविकांची गर्दी झाल्यास अपघाताचा धोका निर्माण होऊ शकतो. तसेच कामात अडथळा येण्याची शक्यता लक्षात घेऊन मंदिर परिसरात प्रवेश पूर्णपणे प्रतिबंधित करण्यात आला आहे.
धार्मिक कार्यक्रमांवरही तात्पुरती बंदी
मंदिर बंद असलेल्या कालावधीत भाविकांना मंदिर परिसरात प्रवेश दिला जाणार नाही. तसेच दैनंदिन पूजा, अभिषेक, विशेष धार्मिक विधी, उत्सव आणि इतर धार्मिक कार्यक्रमांवरही तात्पुरती बंदी कायम ठेवण्यात आली आहे.
भाविकांना सहकार्याचे आवाहन
मंदिर प्रशासनाने नूतनीकरणाचे काम दर्जेदार व सुरक्षितरीत्या पूर्ण करण्यासाठी प्रयत्न सुरू असल्याचे सांगितले आहे. सर्व भाविक आणि पर्यटकांनी १ सप्टेंबरपर्यंत रामदारा शिवालयात दर्शनासाठी येणे टाळावे आणि प्रशासनाला सहकार्य करावे, असे आवाहन करण्यात आले आहे.
काम पूर्ण झाल्यानंतर मंदिर पुन्हा दर्शनासाठी खुले करण्यात येणार असून, त्याबाबतची अधिकृत घोषणा स्वतंत्रपणे करण्यात येईल, असे ट्रस्टच्या वतीने स्पष्ट करण्यात आले आहे.
