पुणे | प्रतिनिधी
समाजसेवा आणि पत्रकारितेच्या माध्यमातून लोकहिताचे कार्य करणारे समाजसेवक तथा युवा पत्रकार संजय केळाबाई रामचंद्र चव्हाण यांना “राज्यस्तरीय आदर्श महाराष्ट्र गौरव पुरस्कार – २०२६” प्रदान करून सन्मानित करण्यात आले. समाजहित, जनजागृती आणि सामाजिक बांधिलकीची दखल घेत त्यांना हा राज्यस्तरीय पुरस्कार देण्यात आला.
पुण्यात विजेता मीडिया यांच्या वतीने आयोजित “आदर्श गौरव सन्मान सोहळा – २०२६” मध्ये विविध क्षेत्रातील मान्यवरांच्या उपस्थितीत पुरस्कार वितरण सोहळा पार पडला. समाजाच्या विविध क्षेत्रात उल्लेखनीय योगदान देणाऱ्या व्यक्तींचा यावेळी गौरव करण्यात आला.
संजय चव्हाण हे जुन्नर तालुक्यात विशेषतः बंजारा समाज तसेच भटक्या-विमुक्त समाजाच्या सामाजिक, शैक्षणिक आणि विकासाशी संबंधित प्रश्नांवर सातत्याने कार्यरत आहेत. शासकीय योजनांची माहिती वंचित घटकांपर्यंत पोहोचवणे, त्यांच्या समस्या प्रशासनासमोर मांडणे आणि न्याय मिळवून देण्यासाठी ते सातत्याने प्रयत्नशील आहेत.
यासोबतच त्यांनी पत्रकारितेच्या माध्यमातूनही लोकहिताचे प्रश्न प्रभावीपणे मांडण्यास सुरुवात केली असून, समाजसेवा आणि पत्रकारिता या दोन्ही क्षेत्रांतून जनतेच्या हितासाठी कार्य करण्याचा त्यांचा प्रयत्न सुरू आहे.
पुरस्कार स्वीकारल्यानंतर संजय चव्हाण म्हणाले, “हा पुरस्कार माझ्यासाठी प्रेरणादायी असून, समाजातील वंचित, गरजू आणि दुर्लक्षित घटकांसाठी अधिक जोमाने कार्य करण्याची जबाबदारी वाढवणारा आहे. भविष्यातही समाजसेवा आणि पत्रकारितेच्या माध्यमातून लोकहितासाठी प्रामाणिकपणे कार्य करत राहीन.”
या राज्यस्तरीय सन्मानाबद्दल त्यांच्यावर विविध क्षेत्रातील मान्यवर, सामाजिक कार्यकर्ते, पत्रकार, मित्रपरिवार आणि नागरिकांकडून अभिनंदनाचा वर्षाव होत असून, त्यांच्या पुढील सामाजिक आणि पत्रकारितेच्या वाटचालीसाठी शुभेच्छा व्यक्त करण्यात येत आहेत.
