नगरसेवकाच्या पत्नीचा विनयभंग केल्याचा आरोप; दोन्ही गटांकडून पोलिसांत तक्रारी
प्रमोद डोंगरे
तालुका प्रतिनिधी पातुर
पातूर : नगरपरिषद निवडणुकीचे निकाल जाहीर होऊन काही दिवस उलटत नाहीत तोच राजकीय वैमनस्यातून पातूर शहरात माजी नगराध्यक्ष आणि नवनिर्वाचित नगरसेवक यांच्यात हाणामारी झाल्याची घटना बुधवारी सायंकाळी बाळापूर रोड परिसरात घडली. या घटनेमुळे शहरात काही काळ तणावाचे वातावरण निर्माण झाले होते.
माजी नगराध्यक्ष हाजी सय्यद बुरान सय्यद नबी आणि प्रभाग क्रमांक एकमधून विजयी झालेले नगरसेवक मोहम्मद शाकीर यांच्यात वाद झाल्याची माहिती आहे. नगरसेवक मोहम्मद शाकीर यांच्या पत्नीने माजी नगराध्यक्ष हाजी सय्यद बुरान यांच्यावर छेडखानी व विनयभंगाचा आरोप केला आहे.
तक्रारीनुसार, माजी नगराध्यक्ष यांच्या सांगण्यावरून काही व्यक्ती आपल्या घरी आल्या आणि ‘तुमच्या विरोधात तिन अपत्याची
टाकलेली तक्रार मागे घेण्याकरीता, बुरान भाई यांच्याकडे चला,’ असे म्हणत आपल्याला जबरदस्तीने वाहनात बसविण्याचा प्रयत्न केल्याचा आरोप नगरसेवकाच्या पत्नीने केला आहे. आपण नकार दिल्यानंतरही जबरदस्तीचा प्रयत्न झाल्याचे त्यांनी तक्रारीत नमूद केल्याची माहिती आहे.
दरम्यान, याच प्रकरणात माजी नगराध्यक्ष हाजी सय्यद बुरान यांनीही तक्रार दिल्याची प्राथमिक माहिती आहे. मोहम्मद शाकीर आणि त्यांच्या पत्नीने आपल्याला मारहाण केली तसेच बाळापूर रोडवरील आपल्या आरा मशीनमध्ये घुसण्याचा व जाळण्याचा प्रयत्न केल्याचा आरोप त्यांनी केला असल्याची माहीती आहे
सदर घटना बाळापूर रोडवरील एका दुकानासमोर दोन्ही बाजूंच्या व्यक्तींमध्ये शाब्दिक वाद झाल्यानंतर त्याचे रूपांतर हाणामारीत झाल्याचे सांगण्यात येते. घटनेनंतर दोन्ही गटांचे समर्थक पातूर पोलीस ठाण्यात दाखल झाले. रात्री उशिरापर्यंत पोलीस ठाण्याबाहेर समर्थकांची गर्दी झाली होती.
दरम्यान, पातूर नगरपरिषद निवडणुकीच्या पार्श्वभूमीवर निर्माण झालेल्या राजकीय वैमनस्यातूनच हा प्रकार घडल्याची चर्चा शहरात सुरू आहे. मात्र, या घटनेमागील नेमके कारण आणि आरोपांची सत्यता पोलीस तपासानंतरच स्पष्ट होणार आहे.
या प्रकरणी दोन्ही गटांकडून तक्रारी दाखल करण्यात आल्या असून पातूर पोलीस ठाण्यात गुन्हा दाखल करण्याची प्रक्रिया रात्री उशिरापर्यंत सुरू असल्याची माहिती आहे.
