शहादा,दि.१२
ग्रंथालय चळवळीचे जनक डॉ. एस. आर. रंगनाथन यांच्या जयंतीनिमित्त पूज्य साने गुरुजी विद्या प्रसारक मंडळाच्या वरिष्ठ महाविद्यालयातील ग्रंथालयात अभिवादन कार्यक्रमाचे आयोजन करण्यात आले होते. हा कार्यक्रम अत्यंत उत्साहात पार पडला.
कार्यक्रमाच्या सुरुवातीला डॉ. एस. आर. रंगनाथन यांच्या प्रतिमेचे पूजन करून त्यांना विनम्र अभिवादन करण्यात आले. महाविद्यालयाचे प्राचार्य डॉ. एम. के. पटेल यांच्या मार्गदर्शनाखाली आयोजित करण्यात आलेल्या या कार्यक्रमास ग्रंथालय विभाग प्रमुख प्रा. डॉ. सुनील पाठक, ग्रंथालय कर्मचारी विशाल पाटील व रईस शेख यांच्यासह बहुसंख्येने विद्यार्थी उपस्थित होते.या प्रसंगी उपस्थितांना मार्गदर्शन करताना ग्रंथपाल प्रा. डॉ. सुनील पाठक यांनी डॉ. रंगनाथन यांच्या जीवनचरित्रावर प्रकाश टाकला. तसेच भारतातील ग्रंथालय चळवळीचा पाया रचण्यात डॉ. रंगनाथन यांचे योगदान किती महत्त्वपूर्ण होते, याविषयी सविस्तर माहिती दिली. विद्यार्थ्यांना वाचनाचे महत्त्व सांगून ग्रंथालयाचा जास्तीत जास्त लाभ घेण्याचे आवाहनही त्यांनी यावेळी केले.
हा कार्यक्रम यशस्वीरीत्या पार पाडण्यासाठी ग्रंथालय विभागातील कर्मचाऱ्यांनी विशेष परिश्रम घेतले. शेवटी उपस्थितांचे आभार मानून कार्यक्रमाची सांगता करण्यात आली.
