🚨 नाशिक कुंभमेळ्याच्या नावाखाली तब्बल ५९१ कोटींची बनावट वर्क ऑर्डर; ३ कोटींची फसवणूक, जामनेरमधून दोघे अटकेत

विभागीय प्रतिनिधी
महेशप्रसाद दिक्षित
: नाशिक येथील गोदावरी काठावर होणाऱ्या सिंहस्थ कुंभमेळ्याची कामे मिळवून देण्याच्या नावाखाली बनावट कार्यारंभ आदेश (वर्क ऑर्डर) तयार करून मोठी आर्थिक फसवणूक केल्याचा धक्कादायक प्रकार नाशिकमध्ये उघडकीस आला आहे. या प्रकरणात जामनेर येथील दोन संशयितांना नाशिक पोलिसांनी अटक केली आहे.

कुंभमेळ्यासाठी राज्य सरकारकडून मोठ्या प्रमाणावर विकासकामे केली जात आहेत. याच पार्श्वभूमीवर संशयितांनी कोणतीही निविदा प्रक्रिया न राबवता तब्बल ५९१ कोटी रुपयांच्या पाच कामांचे बनावट कार्यारंभ आदेश तयार केल्याचा आरोप आहे. या बनावट कागदपत्रांच्या आधारे तक्रारदाराकडून सुमारे ३ कोटी ५ लाख रुपये घेतल्याचे तपासात समोर आले आहे.

या प्रकरणाची गंभीर दखल घेत नाशिक शहर पोलिसांच्या गुन्हे शाखा युनिट-१ ने तपास सुरू केला. तांत्रिक विश्लेषण आणि गोपनीय माहितीच्या आधारे पोलिसांनी तनय अनंत महाजन (३२, रा. पाचोरा रोड, प्रियंका पॅलेससमोर, जामनेर) आणि नरेंद्र तोताराम महाजन (५२, रा. नवसखा, देशमुख गल्ली, जामनेर) यांना ताब्यात घेतले.

चौकशीदरम्यान संशयितांनी गुन्ह्याची कबुली दिल्याचे पोलिसांकडून सांगण्यात आले असून, त्यांना नाशिकरोड पोलिसांच्या ताब्यात देण्यात आले आहे. या प्रकरणात शकील अहमद सलीमुद्दीन शेख, तनय महाजन आणि नरेंद्र महाजन यांच्याविरुद्ध नाशिकरोड पोलिस ठाण्यात विविध कलमांनुसार तीन गुन्हे दाखल करण्यात आले आहेत.

या कारवाईमुळे कुंभमेळ्याच्या कामांच्या नावाखाली बनावट कागदपत्रे तयार करून आर्थिक फसवणूक करणाऱ्या टोळीचे धागेदोरे समोर येण्याची शक्यता असून, पोलिसांकडून पुढील तपास सुरू आहे