कला, विज्ञान व वाणिज्य महाविद्यालय शहादा येथे सीड बॉल निर्मिती कार्यशाळा उत्साहात संपन्न.

शहादा,दि.15(का.प्र.)
येथील पूज्य साने गुरूजी विद्या प्रसारक मंडळाचे कला, विज्ञान व वाणिज्य महाविद्यालयात वनस्पतीशास्त्र आणि क्रीडा विभाग यांच्या संयुक्त विद्यमाने आयोजित सीड बॉल निर्मिती कार्यशाळा अतिशय उत्साहात पार पडली.
पर्यावरण संवर्धन आणि हरित क्षेत्र वाढवण्याच्या दृष्टीने हा अभिनव उपक्रम राबवण्यात आला.कार्यक्रमाच्या उद्घाटना प्रसंगी महाविद्यालयाचे प्राचार्य डॉ. एम. के. पटेल, उपप्राचार्य डॉ. एस. डी. सिंदखेडकर, कनिष्ठ महाविद्यालयाच्या उपप्राचार्या कल्पना पटेल, क्रीडा संचालक प्रा. डॉ. अरविंद कांबळे, कार्यक्रमाचे संयोजक प्रा. डॉ. महेश जगताप, प्रा. डॉ. सुनील पाठक, प्रा. विजया पाटील, प्रा. निलेश आठवले, प्रा. डॉ. गोपाळ गवई, प्रा. डॉ. जितेंद्र माळी तसेच कार्यकारी अधीक्षक गोपाळ सोनार आदी मान्यवर उपस्थित होते.संपूर्ण जगात सध्या ग्लोबल वॉर्मिंगची समस्या मोठ्या प्रमाणात वाढली आहे. या समस्येवर मात करायची असेल तर युवा शक्तीने एकत्रित येत सीड बॉल, वृक्षारोपण तसेच वृक्षतोडीचे दुष्परिणाम समाजात सांगून समाजाला वृक्षारोपणासाठी प्रेरित करायला हवे, असे प्रतिपादन प्राचार्य डॉ. एम. के. पटेल यांनी केले.कार्यशाळेत महाविद्यालयातील विद्यार्थ्यांनी एक हजार पेक्षा अधिक सीड बॉलची निर्मिती केली असून हे सीड बॉल शहादा तालुक्यात व सातपुडा पर्वत रांगेतील विविध भागात टाकण्यात येणार आहेत.

या अभिनव उपक्रमाबद्दल संस्थेचे अध्यक्ष दीपकभाई पाटील, उपाध्यक्ष जगदीश पाटील, समन्वयक प्रा. मकरंद पाटील,संचालक मयूरभाई पाटील यांनी कार्यशाळेत सहभागी झालेल्या विद्यार्थ्यांचे कौतुक केले.
कार्यक्रमाचे प्रास्ताविक प्रा. डॉ. अरविंद कांबळे यांनी केले. सूत्रसंचालन प्रा. डॉ. महेश जगताप यांनी केले व आभार प्रा. जितेंद्र माळी यांनी मानले. कार्यक्रम यशस्वीतेसाठी प्रा. यामिनी पाटील, प्रा. प्रियंका पाटील, संजय विसावे, दिलवर ठाकरे, राहुल बागले आदींनी काम पाहिले.