अमोल देवकर श्रीवर्धन प्रतिनिधी
श्रीवर्धन : आरावी गावात राष्ट्रवादी काँग्रेस पक्षाला मोठा राजकीय धक्का बसला असून, ग्रामपंचायत सदस्य देविंदर पेडणेकर यांच्यासह गावातील युवक व ज्येष्ठ नागरिकांनी शिवसेना (शिंदे गटात) जाहीर प्रवेश केला.
शिवसेना जिल्हाप्रमुख प्रमोदशेठ घोसाळकर यांच्या प्रमुख उपस्थितीत हा पक्षप्रवेश सोहळा पार पडला. या पक्षप्रवेशामध्ये अनिस वस्ता यांच्या नेतृत्वाखाली अनेक कार्यकर्ते व नागरिक शिवसेनेत सहभागी झाले.
या पक्षप्रवेशासाठी विभागप्रमुख प्रज्योतभाई नंदविलकर तसेच नबील सरखोत यांनी विशेष मेहनत घेतली. त्यांच्या सातत्यपूर्ण प्रयत्नांमुळे आरवी गावातील नागरिकांनी शिवसेनेच्या विचारधारेवर विश्वास व्यक्त करत पक्षात प्रवेश केला.
यावेळी शिवसेनेचे ज्येष्ठ नेते तथा माजी जिल्हा परिषद सदस्य अविनाशभाई कोलंबेकर उपस्थित होते. त्यांनी नव्याने पक्षात प्रवेश केलेल्या कार्यकर्त्यांचे स्वागत करून त्यांना मार्गदर्शन केले. गावपातळीवर पक्ष संघटना अधिक मजबूत करण्यासाठी सर्वांनी एकजुटीने काम करावे आणि सर्वसामान्य नागरिकांच्या प्रश्नांसाठी सदैव पुढे राहावे, असे आवाहन त्यांनी केले.
या प्रसंगी शिवसेनेचे विभागप्रमुख, पदाधिकारी, कार्यकर्ते तसेच ग्रामस्थ मोठ्या संख्येने उपस्थित होते. आरवी गावातील या पक्षप्रवेशामुळे शिवसेना (शिंदे गटाची) स्थानिक पातळीवरील संघटनात्मक ताकद वाढल्याचे चित्र निर्माण झाले आहे.
