पाच महिन्यांपासून बंद असलेली अलिबाग-सासवणे बससेवा लवकरच होणार पूर्ववत; २२ ऑगस्टला यशस्वी ट्रायल
अलिबाग : प्रतिनिधी
गेल्या पाच महिन्यांपासून बंद असलेल्या अलिबाग-सासवणे मार्गावरील महाराष्ट्र राज्य मार्ग परिवहन महामंडळाची (एसटी) बससेवा अखेर पुन्हा सुरू होण्याच्या मार्गावर आली आहे. या समस्येची दखल घेत ‘सारथी महाराष्ट्राचा’ ने एसटी बससेवा बंद असल्याबाबत वृत्त प्रसिद्ध करून प्रशासनाचे लक्ष वेधले होते. या वृत्ताला आता यश आले आहे.
बससेवा पूर्ववत सुरू करण्यासाठी गावातील मिलिंद ठाकूर, अमोल काठे, मंगेश गावंड, प्रणय घरत यांच्यासह ग्रामस्थांनी अलिबाग एसटी आगारातील वरिष्ठ अधिकाऱ्यांकडे सातत्याने पाठपुरावा केला. तसेच पंचायत समितीच्या उपाध्यक्षा प्रिया प्रमोद भगत, प्रमोद भगत सर, स्थानिक आमदार महेंद्र दळवी आणि परिवहन मंत्री प्रताप सरनाईक यांच्याकडेही बससेवा सुरू करण्याची मागणी करण्यात आली.
याशिवाय ग्रामस्थांच्या सुमारे शेकडो सह्यांचा अर्ज प्रशासनाकडे सादर करून एसटी सेवा पूर्ववत करण्याची मागणी करण्यात आली होती.
या सातत्यपूर्ण पाठपुराव्याला अखेर यश आले असून, शनिवार, दि. २२ ऑगस्ट २०२६ रोजी अलिबाग ते सासवणे मार्गावर एसटी बसची ट्रायल घेण्यात आली. ही ट्रायल यशस्वीरीत्या पूर्ण झाल्यानंतर येत्या पाच दिवसांत बससेवा नियमितपणे सुरू करण्यात येणार असल्याची माहिती मिळाली आहे.
बससेवा पुन्हा सुरू होणार असल्याने सासवणे परिसरातील ग्रामस्थ, विद्यार्थी, नोकरदार आणि नियमित प्रवाशांमध्ये समाधानाचे वातावरण निर्माण झाले आहे. गेल्या काही महिन्यांपासून प्रवाशांना खासगी वाहनांवर अवलंबून राहावे लागत असल्याने त्यांची मोठी गैरसोय होत होती.
दरम्यान, अलिबाग आगाराच्या उपलब्ध वेळापत्रकाच्या माहितीत सासवणे मार्गाचा समावेश असल्याचेही सांगण्यात आले आहे. बससेवा सुरू झाल्यानंतर विद्यार्थ्यांनी एसटीच्या विद्यार्थी बस पास योजनेचा जास्तीत जास्त लाभ घ्यावा, असे आवाहन एसटी आगाराच्या अधिकाऱ्यांकडून करण्यात आले आहे.
‘सारथी महाराष्ट्राचा’च्या वृत्तासोबत ग्रामस्थ, सामाजिक कार्यकर्ते आणि लोकप्रतिनिधींनी केलेल्या सातत्यपूर्ण पाठपुराव्याला मिळालेले हे यश असल्याची भावना परिसरातून व्यक्त होत आहे.
