नेतृत्वगुण व लोकशाही मूल्यांची रुजवणूक; नवनिर्वाचित पदाधिकाऱ्यांनी घेतली शपथ
सालवा, ता. मौदा, जि. नागपूर
सालवा येथील ग्रामीण विकास विद्यालय व ग्रामीण ज्युनिअर कॉलेजमध्ये शालेय विद्यार्थी मंत्रिमंडळाची स्थापना व शपथविधी समारंभ उत्साहपूर्ण वातावरणात विद्यालयाच्या सभागृहात पार पडला.
विद्यालयाचे प्राचार्य श्री. आर. आर. मोटघरे यांच्या हस्ते नवनिर्वाचित विद्यार्थी मंत्रिमंडळातील पदाधिकाऱ्यांना पदाची शपथ देण्यात आली. यावेळी मुख्यमंत्री म्हणून चि. चेतन भारत पाहूने, इयत्ता बारावी विज्ञान, तर उपमुख्यमंत्री म्हणून कु. किंजल पुरुषोत्तम महादुले, इयत्ता दहावी, यांनी शपथ घेतली. तसेच मंत्रिमंडळातील इतर नवनिर्वाचित मंत्र्यांनीही आपल्या पदाची शपथ घेतली.
नवनिर्वाचित पदाधिकाऱ्यांनी विद्यालयाची शिस्त, स्वच्छता, शैक्षणिक प्रगती, सामाजिक बांधिलकी आणि विद्यार्थ्यांच्या हितासाठी प्रामाणिकपणे कार्य करण्याची प्रतिज्ञा केली.
विद्यार्थ्यांमध्ये नेतृत्वगुण, जबाबदारीची जाणीव, निर्णयक्षमता, शिस्त आणि लोकशाही मूल्यांची रुजवणूक व्हावी, हा विद्यार्थी मंत्रिमंडळ स्थापनेमागील प्रमुख उद्देश आहे. प्रत्यक्ष नेतृत्वाचा अनुभव मिळाल्यामुळे विद्यार्थ्यांना भविष्यात जबाबदार नागरिक म्हणून घडण्यास या उपक्रमाची मदत होणार आहे.
यावेळी विद्यालयाचे पर्यवेक्षक श्री. एस. आर. पेंडाम सर तसेच मंत्रिमंडळ संयोजक श्री. राजेश ढोके सर यांची प्रमुख उपस्थिती होती. नवनिर्वाचित विद्यार्थी मंत्रिमंडळाचे अभिनंदन करून सर्व पदाधिकाऱ्यांनी आपल्या जबाबदाऱ्या प्रामाणिकपणे व निष्ठेने पार पाडाव्यात, असे आवाहन करण्यात आले.
कार्यक्रमास विद्यालयातील शिक्षकवृंद, शिक्षकेतर कर्मचारी आणि विद्यार्थी मोठ्या संख्येने उपस्थित होते. उत्साहपूर्ण व शिस्तबद्ध वातावरणात विद्यार्थी मंत्रिमंडळाचा शपथविधी समारंभ संपन्न झाला.
