५०० व्या नवीकरण अभ्यासक्रमाच्या अंतिम परीक्षेत ३६ शिक्षकांमधून मिळवले अव्वल स्थान
अमळनेर : प्रतिनिधी
येथील कै. बापू खुशाल पाटील माध्यमिक व उच्च माध्यमिक आश्रमशाळा, गडखांब (ता. अमळनेर) येथील उपशिक्षक चेतन किसन जाधव यांनी केंद्रीय हिंदी संस्थान, हैदराबाद केंद्राच्या वतीने आयोजित ५०० व्या नवीकरण अभ्यासक्रमाच्या अंतिम परीक्षेत जळगाव जिल्ह्यातून प्रथम क्रमांक पटकावला आहे. त्यांच्या या उल्लेखनीय यशामुळे तालुका तसेच शाळेच्या शिरपेचात मानाचा तुरा रोवला आहे.
केंद्रीय हिंदी संस्थान, हैदराबाद केंद्र (शिक्षण मंत्रालय, भारत सरकार) यांच्या वतीने १० ऑगस्ट ते २२ ऑगस्ट २०२६ या कालावधीत हिंदी शिक्षकांसाठी विशेष नवीकरण अभ्यासक्रम (Refresher Course) आयोजित करण्यात आला होता.
या प्रशिक्षणामध्ये महाराष्ट्रातील जळगाव जिल्ह्यातून एकूण ३६ हिंदी शिक्षकांनी सहभाग घेतला होता. प्रशिक्षणादरम्यान घेण्यात आलेल्या अंतिम परीक्षेत चेतन किसन जाधव यांनी उत्कृष्ट कामगिरी करत सहभागी ३६ शिक्षकांमध्ये प्रथम क्रमांक मिळविला.
त्यांच्या या उल्लेखनीय कामगिरीबद्दल संस्थेच्या वतीने त्यांना अधिकृत प्रमाणपत्र व सन्मानचिन्ह देऊन गौरविण्यात आले.
चेतन जाधव यांच्या या यशाबद्दल संस्थेचे पदाधिकारी, मुख्याध्यापक, शिक्षकवृंद, मनिष किसन जाधव व परिवार, अमळनेर, तसेच मित्रपरिवार आणि शुभेच्छुकांकडून त्यांचे अभिनंदन करण्यात येत आहे. त्यांच्या यशामुळे शाळेतील शिक्षक व विद्यार्थ्यांमध्येही आनंदाचे वातावरण आहे.
