खेडकरवाडीत ग्रामस्थांकडून भव्य नागरी सत्कार
लोहा प्रतिनिधी :- हणमंत पांचाळ
प्राथमिक शिक्षक म्हणून आपल्या कार्याची सुरुवात करून राज्याच्या शिक्षण संचालकपदापर्यंत उल्लेखनीय वाटचाल करणारे डॉ. गोविंद नांदेडे यांनी शैक्षणिक क्षेत्रात ३८ पदव्या आणि सात सुवर्णपदके मिळवून उल्लेखनीय कामगिरी केली आहे. त्यांच्या या शैक्षणिक कामगिरीची नोंद इंग्लंडच्या लंडन बुक ऑफ वर्ल्ड रेकॉर्डमध्ये करण्यात आली आहे. या उल्लेखनीय कामगिरीबद्दल खेडकरवाडी ग्रामस्थांच्या वतीने डॉ. नांदेडे यांचा भव्य नागरी सत्कार करण्यात आला.
या सत्कार समारंभाच्या अध्यक्षस्थानी शिवा संघटनेचे संस्थापक तथा सेवा जनशक्ती पार्टीचे अध्यक्ष प्रा. मनोहर धोंडे होते. प्रमुख अतिथी म्हणून सेवानिवृत्त सनदी अधिकारी एकनाथ ऊर्फ अनिल मोरे, उपशिक्षणाधिकारी गंगाधर राठोड आणि सेवानिवृत्त गटशिक्षणाधिकारी सर्जेराव टेकाळे उपस्थित होते.
याप्रसंगी गावातील मा. सरपंच बाबूसराव नेळगे, माजी चेअरमन रामराव खेडकर , मारोतराव नागसाखरे, माजी सैनिक माधव झरे, कैलास नागसाखरे, गणेश खेडकर, बालाजी नागसाखरे, नामदेव कारेगावकर, माधव दगडगावे, पोलीस पाटील शिवानंद खेडकर, विश्वनाथ नेळगे, बसवेश्वर नेळगे, लक्ष्मण नागसाखरे, संभाजी खेडकर, धोंडीराम खेडकर, आपाराव नेळगे, गुंडेराव खेडकर,लक्ष्मण मारवाडे, गुणाजी खिचडे,राजु बारोळे, माधव स्वामी,सोमनाथ नेळगे,संदिप नागसाखरे,गंगाधर नेळगे,,अशोक खेडकर, बापुराव नागसाखरे, रावसाहेब नेळगे, शिवा खेडकर,उपस्थित होते.
डॉ. गोविंद नांदेडे यांनी प्राथमिक शिक्षक म्हणून आपल्या सेवाकार्याला सुरुवात केली. शिक्षण क्षेत्रातील विविध जबाबदाऱ्या समर्थपणे पार पाडत त्यांनी राज्याच्या शिक्षण संचालकपदापर्यंत मजल मारली.
सेवाकाळासोबतच शिक्षणाची अखंड साधना सुरू ठेवत त्यांनी विविध १२ विद्यापीठं ३०४ परीक्षा ३८ पदव्या सात सुवर्णपदक मिळवले आहेत. त्यांच्या या असामान्य शैक्षणिक वाटचालीचे कौतुक करत ग्रामस्थांनी त्यांचा सन्मान केला. यावेळी उपस्थित मान्यवरांनी डॉ. नांदेडे यांच्या कार्याचा गौरव करून त्यांच्या शैक्षणिक जिद्दीतून तरुणांनी प्रेरणा घ्यावी, असे आवाहन केले. कार्यक्रमास खेडकरवाडीतील ग्रामस्थ, नागरिक, शिक्षण क्षेत्रातील मान्यवर आणि विविध क्षेत्रांतील पदाधिकारी मोठ्या संख्येने उपस्थित होते. यावेळी सेवानिवृत्त सनदी अधिकारी एकनाथ मोरे, उपशिक्षणाधिकारी गंगाधर राठोड, सर्जेराव टेकाळे, यांची भाषणे झाली, प्रास्ताविक बालाजी नागसाखरे यांनी तर आभारप्रदर्शन आनंद वाळके यांनी केले. तर सुत्रसचालन विक्रम कदम यांनी केले.
चौकट
शिक्षणाच्या बाबतीत जागरुक गाव
खेडकरवाडी गाव शिक्षणाच्या बाबतीत जागरुक गाव आहे, येथील अनेक तरुण विविध क्षेत्रात नोकरीत कार्यरत आहेत, जागरुक पालकांमुळे शाळेत गुणवत्ता असुन विद्यार्थ्यांना प्रेरणा मिळावी अशा कार्यक्रमांचे आयोजन गावात केले जाते, त्याचाच भाग म्हणून हा सत्कार कार्यक्रम आयोजित करण्यात आला होता, डॉ गोविंद नांदेडे यांनीही निर्वयसनी राहा, शिक्षणाची कास धरा, अधिकारी व्हा असा संदेश विद्यार्थ्यांना दिला.
चौकट
फुकट राशन नको.. शिक्षण द्या – प्रा धोंडे
यावेळी प्रा. मनोहर धोंडे यांनी अध्यक्षीय समारोपातुन डॉ. गोविंद नांदेडे यांचा कार्याचा गौरव करताना सध्याच्या शिक्षण पद्धतीवर टीकास्त्र सोडले सध्या सामान्य माणसाच्या आवाक्या बाहेर शिक्षणाचा खर्च गेला असून शासन 80 कोटी लोकांना फुकट राशन वाटल्याची डिंगोरी पेटत आहे मात्र फुकट राशन पेक्षा फुकट शिक्षण देणे सध्याची गरज असल्याचे त्यांनी सांगितले.
