कंटेनरसह सुमारे ३५.९० लाखांचा मुद्देमाल जप्त; एक आरोपी अटकेत
परतूर, जि. जालना (प्रतिनिधी) : कत्तलीच्या उद्देशाने अवैधरित्या वाहतूक करण्यात येत असलेल्या २८ गोवंशांची परतूर पोलिसांनी सुटका केली. गोपनीय माहितीच्या आधारे पोलिसांनी केलेल्या या कारवाईत गोवंशांची वाहतूक करण्यासाठी वापरण्यात आलेला अशोक लेलँड कंपनीचा कंटेनर (क्र. MH 04 LQ 8802) जप्त करण्यात आला. या कारवाईत गोवंश व कंटेनरसह सुमारे ३५ लाख ९० हजार रुपयांचा मुद्देमाल जप्त करण्यात आला आहे.
परतूर पोलीस ठाण्याच्या हद्दीत गोवंशांची अवैधरित्या वाहतूक होत असल्याची गोपनीय माहिती पोलिसांना मिळाली होती. माहितीची खातरजमा करून पोलिसांनी तातडीने कारवाई केली. यावेळी कत्तलीच्या उद्देशाने वाहतूक करण्यात येत असलेल्या २८ गोवंशांची सुटका करण्यात आली.
या प्रकरणी गु.र.नं. 0429/2026 अन्वये भारतीय न्याय संहिता, 2023 चे कलम 3(5), महाराष्ट्र प्राणी संरक्षण अधिनियम, 1976 तसेच महाराष्ट्र प्राण्यांचा छळ प्रतिबंधक अधिनियम, 1960 मधील संबंधित तरतुदींनुसार गुन्हा दाखल करण्यात आला आहे. प्रकरणातील एका आरोपीला अटक करण्यात आली असून पुढील तपास सुरू आहे.
ही कारवाई पोलीस अधीक्षक तेघबीर सिंग संधू, अपर पोलीस अधीक्षक विक्रम साळी आणि उपविभागीय पोलीस अधिकारी आर. टी. रेंगे यांच्या मार्गदर्शनाखाली करण्यात आली.
परतूर पोलीस ठाण्याचे पोलीस निरीक्षक सुदाम भागवत, पोलीस उपनिरीक्षक अमोल रावते, पोलीस कॉन्स्टेबल खंदारे, पो.कॉ. जाधव (ब.क्र. १४१९), गीते, गोविंद पवार, ज्ञानेश्वर वाघ, परमेश्वर माने आणि नितीन बोन्डारे यांच्या पथकाने ही कारवाई यशस्वीरीत्या पार पाडली.
अटक करण्यात आलेल्या आरोपीविरुद्ध पुढील कायदेशीर कार्यवाही सुरू असून, पोलीस उपनिरीक्षक अमोल रावते हे या प्रकरणाचा पुढील तपास करीत आहेत.
