रस्ते दुरुस्ती, विद्युत तारा-फांद्या हटविण्यासह सुरक्षा उपाययोजनांचे प्रशासनाकडून निर्देश
आजरा | प्रतिनिधी : गणेश विसर्जनादरम्यान कोणतीही अनुचित दुर्घटना घडू नये तसेच वाहतूक व्यवस्था सुरळीत राहावी, यासाठी आजरा शहरातील गणेश विसर्जन मार्गांची नगरपंचायत, पोलीस प्रशासन, सार्वजनिक बांधकाम विभाग, महसूल विभाग आणि महावितरणच्या अधिकाऱ्यांनी संयुक्त पाहणी केली. पाहणीदरम्यान विसर्जन मार्गावरील अडचणी तातडीने दूर करून आवश्यक उपाययोजना करण्याचे निर्देश संबंधित विभागांना देण्यात आले.
आजरा शहर व परिसरात प्रामुख्याने परोली गोंड, शिवाजीनगर घाट, वडाचा गोंड, संताजी पूल आणि गऊळदेव गोंड या ठिकाणी श्री गणेशमूर्तींचे विसर्जन केले जाते. या सर्व मार्गांची प्रत्यक्ष पाहणी करून गणेशमूर्तींची वाहतूक, भाविकांची गर्दी आणि सुरक्षिततेच्या दृष्टीने आवश्यक उपाययोजनांचा आढावा घेण्यात आला.
खड्डे बुजविण्याच्या सूचना
गणेशमूर्ती घेऊन जाणाऱ्या वाहनांना रस्त्यावरील खड्ड्यांमुळे धक्का बसू नये, यासाठी विसर्जन मार्गावरील खड्डे तातडीने बुजविण्याच्या सूचना देण्यात आल्या. तसेच रस्त्यावरील इतर अडथळे दूर करण्याचे निर्देश संबंधित विभागांना देण्यात आले.
विद्युत तारा व झाडांच्या फांद्यांची पाहणी
उंच गणेशमूर्तींच्या वाहतुकीत अडथळा ठरणाऱ्या लोंबकळणाऱ्या विद्युत तारा तातडीने दुरुस्त कराव्यात. तसेच मार्गावरील झाडांच्या धोकादायक फांद्यांची छाटणी करण्याच्या सूचना देण्यात आल्या. विसर्जन घाटांवर पुरेशी विद्युत रोषणाई, बॅरिकेडिंग आणि जीवरक्षकांची व्यवस्था करण्याबाबतही प्रशासनाने निर्देश दिले.
गर्दीच्या ठिकाणी वाहतूक कोंडी होऊ नये, यासाठी पार्किंग तसेच वाहतूक व्यवस्थेचे योग्य नियोजन करण्यावर भर देण्यात आला.
खोल पाण्यात जाणे टाळण्याचे आवाहन
यावेळी सहाय्यक पोलीस निरीक्षक बाबासाहेब सरवदे म्हणाले, “विसर्जन शांततेत आणि सुरक्षितपणे पार पडावे यासाठी सर्व विभागांनी संयुक्त पाहणी केली आहे. विसर्जनावेळी नागरिकांनी अतिउत्साह दाखवून खोल पाण्यात जाऊ नये. पोलीस प्रशासन आणि गणेश मंडळांनी योग्य समन्वय ठेवून गर्दीचे नियोजन करावे.”
शिवाजीनगर तरुण मंडळाची १५ ते २० वर्षांची परंपरा
स्थानिक व्यवस्थेबाबत माहिती देताना नाथा देसाई यांनी सांगितले की, “शिवाजीनगर तरुण मंडळाचे सुमारे ३० ते ४० पट्टीचे पोहणारे कार्यकर्ते नदीत साकव व तरफा बांधून विसर्जनाची जबाबदारी घेतात. तहसील कार्यालयाकडून त्यांना लाईफ जॅकेट्स पुरवले जातात. बाप्पाच्या मूर्तीला कोणतीही इजा न पोहोचवता विसर्जन करण्याची ही परंपरा मंडळ गेल्या १५ ते २० वर्षांपासून यशस्वीपणे राबवत आहे.”
या संयुक्त पाहणीदरम्यान मुख्याधिकारी सुरज सुर्वे, नायब तहसीलदार म्हाळसाकांत देसाई, नगरपंचायतीचे आरोग्य अधिकारी अमर कांबळे, महावितरणचे सहाय्यक अभियंता कृष्णा कोळी, मुख्य लाईनमन संतोष डोंगरे, पोलीस विभागाचे अनंत देसाई यांच्यासह विविध विभागांचे अधिकारी व कर्मचारी उपस्थित होते.
