हर्दखळे ग्रामपंचायतीतील विकासकामे, आर्थिक व्यवहार व निधी वापर तपासण्याची BDO कडे मागणी
लांजा | प्रतिनिधी : हर्दखळे ग्रामपंचायतीतील माजी सरपंच राजश्री लाड यांच्या सन २०१५ ते २०२० या कार्यकाळातील तसेच त्यानंतरच्या प्रशासकांच्या कार्यकाळातील विकासकामे, आर्थिक व्यवहार, शासकीय निधीचा वापर आणि प्रशासकीय निर्णयांची सखोल चौकशी करण्यात यावी, अशी मागणी करण्यात आली आहे.
याबाबत गटविकास अधिकारी, पंचायत समिती लांजा यांच्याकडे लेखी निवेदन साद करण्यात आले असून, संबंधित कालावधीतील ग्रामपंचायतीच्या सर्व आर्थिक व प्रशासकीय नोंदी तपासण्यात याव्यात, अशी मागणी निवेदनातून करण्यात आली आहे.
विकासकामांशी संबंधित कागदपत्रे, अंदाजपत्रके, वर्क ऑर्डर, मोजमाप पुस्तिका (MB), बिले-व्हाउचर, पूर्णत्व प्रमाणपत्रे, ग्रामसभा व ग्रामपंचायत ठराव तसेच विविध शासकीय निधीच्या खर्चाचा ताळमेळ तपासण्यात यावा, अशी मागणी करण्यात आली आहे.
माजी सरपंच व प्रशासकांना चौकशीसाठी बोलावण्याची मागणी
चौकशी निष्पक्ष आणि पारदर्शकपणे व्हावी, यासाठी माजी सरपंच राजश्री लाड तसेच संबंधित प्रशासकांना BDO कार्यालयात ठरावीक दिनांक व वेळेस चौकशीसाठी उपस्थित राहण्याबाबत लेखी नोटीस देण्यात यावी, अशी मागणी करण्यात आली आहे.
तसेच तत्कालीन ग्रामसेवक, संबंधित अधिकारी-कर्मचारी, पदाधिकारी आणि विकासकामांशी संबंधित व्यक्तींचे जबाब नोंदवून उपलब्ध कागदपत्रांची पडताळणी करावी, अशी मागणीही करण्यात आली आहे.
“चौकशीत कोणतीही आर्थिक अथवा प्रशासकीय अनियमितता आढळल्यास संबंधितांची जबाबदारी निश्चित करून नियमानुसार कारवाई करावी. तसेच चौकशीचा अहवाल उपलब्ध करून द्यावा,” अशी मागणी किरण दत्ताराम चव्हाण यांनी केली आहे.
दरम्यान, या निवेदनाच्या पार्श्वभूमीवर पंचायत समिती प्रशासनाकडून कोणती कार्यवाही केली जाते, याकडे हर्दखळे ग्रामस्थांचे लक्ष लागले आहे.
