बोथडी खु. येथील ग्रामस्थांची सहाय्यक जिल्हाधिकाऱ्यांकडे तक्रार; चौकशी व कारवाईची मागणी
किनवट | प्रतिनिधी : किनवट तालुक्यातील बोथडी खु. येथील घरकुल मंजूर झालेल्या लाभार्थ्यांकडून अभियंता हर्षद तेलंग यांच्यामार्फत प्रत्येक घरकुलामागे १० हजार रुपयांची मागणी केली जात असल्याचा आरोप ग्रामस्थांनी केला आहे. या प्रकरणी रिपब्लिकन सेनेच्या पदाधिकाऱ्यांनी किनवट येथील सहाय्यक जिल्हाधिकाऱ्यांकडे लेखी तक्रार साद करून चौकशी व दोषींवर कारवाई करण्याची मागणी केली आहे.
या तक्रारीवर रिपब्लिकन सेनेचे माजी मराठवाडा विभागीय सचिव राजेंद्र शेळके, माजी जिल्हा उपाध्यक्ष मारोती गायकवाड, किनवट-माहूर विधानसभा प्रमुख कांता दराडे, शिवराज मुंडे, तालुका सचिव श्याम बेरडवार, यादव धनवे, जीवा गादेकर, सुनील पाईकराव, बालाजी गायकवाड, चंद्रकांत वाघमारे, बालाजी तलांडे, संतोष टाळंमवाड, गजानन गेडाम आणि खंडू दराडे आदींच्या स्वाक्षऱ्या आहेत.
तक्रारीनुसार, बोथडी खु. येथील रहिवाशांची घरकुल मंजुरी यादी सन २०२३-२४ नुसार तयार करण्यात आली आहे. मात्र, अभियंता हर्षद तेलंग यांच्याकडून कथित आर्थिक मागणी केली जात असल्याने काही लाभार्थ्यांची घरकुले अद्याप पूर्णत्वास आलेली नसल्याचे तक्रारीत नमूद करण्यात आले आहे. तसेच प्रत्येक देयकाच्या मंजुरीसाठी पैशांची मागणी केली जात असल्याचा आरोपही करण्यात आला आहे.
लाभार्थ्यांची आर्थिक परिस्थिती बिकट
प्रति घरकुल १० हजार रुपये मागितले जात असल्याचा आरोप असून, काही लाभार्थ्यांनी घरकुलाच्या देयकासाठी पैसे दिल्याचेही तक्रारीत नमूद करण्यात आले आहे. संबंधित लाभार्थी मजूर व भूमिहीन शेतमजूर असून मोलमजुरी करून आपल्या कुटुंबाचा उदरनिर्वाह करतात. त्यामुळे अतिरिक्त आर्थिक मागणीमुळे त्यांच्यासमोर अडचणी निर्माण होत असल्याचे ग्रामस्थांनी प्रशासनाच्या निदर्शनास आणून दिले आहे.
या प्रकरणाची तातडीने व निष्पक्ष चौकशी करून आरोपांमध्ये तथ्य आढळल्यास संबंधितांवर कायदेशीर कारवाई करावी, तसेच पात्र लाभार्थ्यांची घरकुलाची देयके कोणतीही बेकायदेशीर कपात न करता अदा करावीत, अशी मागणी रिपब्लिकन सेनेच्या वतीने करण्यात आली आहे.
दरम्यान, या तक्रारीची प्रशासनाकडून चौकशी झाल्यानंतर नेमके काय तथ्य समोर येते आणि संबंधितांवर कोणती कार्यवाही केली जाते, याकडे बोथडी खु. ग्रामस्थांचे लक्ष लागले आहे.
